Өнөө жилийн Дэлхийн аварга шалгаруулах тэмцээнд амжилттай оролцсон Монголын жүдо бөхийн шигшээ багийн тамирчин, дасгалжуулагчид эх орондоо ирлээ. Жүдо бөхийн ДАШТ өнгөрсөн наймдугаар сарын 28-наас энэ сарын 3-ны хооронд болж өндөрлөсөн. Энэхүү тэмцээнд Монголын жүдочид эрэгтэй, эмэгтэй тус бүр есөн тамирчны бүрэлдэхүүнтэй оролцож, нэг алт, нэг мөнгө, дөрвөн хүрэл медаль хүртсэн амжилтаар 126 орноос гуравдугаар байрт шалгарсан амжилттайгаар оролцсон юм.
Дэлхийн чансааг тэргүүлж буй тамирчин Д.Сумъяаг хүндэтгэн хүлээн авах ёслолын үеэр МУГТ дасгалжуулагч О.Балжинням тэргүүтэй хүмүүс хэвлэлийн хурал зарлаж, сэтгүүлчдэд мэдээлэл өглөө.
Энэ үеэр Монгол Улсын гавьяат дасгалжуулагч О.Балжинням “Энэ удаагийн ДАШТ-ээс зургаан медаль авсан амжилттай оролцож, эх орондоо ирлээ. Монголын түүхэнд байгаагүй амжилт гаргаж чадсан гэж бодож байна. Бидэнд тусалж дэмжсэн тамирчдын минь гэр бүл, дасгалжуулагчид, Монголын жүдо бөхийн холбоо, Монголын ард түмэндээ баярлаж, талархаж байгаагаа илэрхийлье. Олон хүний хүч хөдөлмөрөөр бид ийм амжилт гаргаж чадлаа” гэв.
