Хичээлийн шинэ жил эхлэх гэж байгаатай холбоотойгоор хөдөө, орон нутгаас Улаанбаатар хотыг чиглэх иргэд, тээврийн хэрэгслийн хөдөлгөөн эрс нэмэгдэж байгаа. Иймээс зам тээврийн ослын эсрэг жил бүрийн энэ үеэр Замын цагдаагийн алба, Автотээврийн үндэсний төв хамтран “Оюутан тээвэр” хамтарсан хяналт шалгалтыг орон нутгийн замд зохион явуулдаг ажээ.
Энэ жил энэ сарын 18-ны өдрөөс есдүгээр сарын 15-ны өдрийг хүртэлх хугацаанд улс, хот хоорондын авто замд нийтийн тээврийн хэрэгслээр зорчигчид зам тээврийн гэмт хэрэг, осолд өртөхөөс урьдчилан сэргийлэх, нийтийн зорчигч тээврийн үйлчилгээ эрхлэгчдийн үйл ажиллагаанд Төрийн хяналт шалгалтын тухай хууль, Авто тээврийн тухай хууль, Зөрчлийн тухай хууль, Замын хөдөлгөөний дүрэм болон бусад холбогдох хууль тогтоомж, стандартын хэрэгжилтийг хангуулах зорилгоор дээрх хяналт шалгалтыг зохион байгуулж байгаа гэнэ. Уг хяналт шалгалтаар:
-Нийтийн зорчигч тээврийн үйлчилгээ эрхлэх тусгай зөвшөөрөлгүй, гэрээгүй, гэрээний хугацаа дууссан иргэн, аж ахуй нэгж байгууллагын тээврийн хэрэгслээр тээвэрлэлт хийлгэхгүй байх,
-Хамтарсан хөдөлгөөнт эргүүл ажиллуулах,
-Орон нутгийн замд хөдөлгөөнд оролцогчдод хяналт тавих, илэрсэн зөрчлийг газар дээр нь арилгуулах, хамгаалах бүс, хамгаалалтын малгай хэрэглэж хэвшүүлэх зэрэг чиглэлээр ажиллаж байна гэж Замын цагдаагийн албанаас мэдээллээ.
Иймээс иргэд өөрсдийн болон хайртай хүмүүсийнхээ амь нас, эрүүл мэндийг хамгаалж нийтийн зорчигч тээврийн үйлчилгээ эрхлэх тусгай зөвшөөрөлтэй, техникийн хяналтын үзлэг, оношлогоонд хамрагдсан, даатгалтай тээврийн хэрэгслээр үйлчлүүлэх хэрэгтэй гэнэ. Мөн хувийн тээврийн хэрэгслээр зорчиж байгаа тохиолдолд хурдыг хэтрүүлэлгүйгээр зохистой хурдыг сонгон зорчих, жолооч болон зорчигч нар хамгаалах бүс, хамгаалах малгайг хэрэглэх, амрах, зогсоолд зогсох тохиолдолд авто замыг бүрэн чөлөөлж, аюулгүй байдлаа хангах, бага насны хүүдийг зөв тээвэрлэж, байнга хараа хяналтандаа байлгахыг онцгойлон зөвлөж байна.
Б.УРАН