Сүүлийн нэг сарын хугацаанд Хэнтий аймгийн төв Чингис хот-Улаанбаатар чиглэлийн төв магистрал замд мал дайрагдсан 4 осол бүртгэгджээ. Ослын улмаас иргэд 4 автомашин, 7 тооны адуугаар хохирсон мэдээллийг орон нутгийн эх сурвалж мэдээлэв. Хэнтий аймгийн Жаргалтхаан сум дахь Цагдаагийн тасгаас мэдээлснээр, дээрх осол гарах болсон шалтгаан нь малчид, жолооч нар дүрэм журмаа биелүүлдэггүйтэй холбоотой аж.
Монгол Улсын Замын хөдөлгөөний дүрмийн 23.7 дахь хэсэгт суурин газрын гаднах засмал замаар малыг зорчих хэсгийн дагуу тууж явах, улмаар засмал замд 50 метрээс дотогш хариулгагүй мал байлгахыг хориглосон байдаг. Мөн малыг зам хөндлөн буюу гүүрээр аль болох түргэн, бөөнөөр нь гаргаж, энэ үед ойртон ирж яваа тээврийн хэрэгсэл зам тавьж өгнө гэснийг зөрчсөн, дүрэмд заасан хурдыг тогтоосон хэмжээнээс хэтрүүлсэн, шөнийн цагт гэрлийг ойрд шилжүүлээгүйтэй холбоотойгоор дээрх осол нэмэгдэж байгаа ажээ.