Бразилын Ерөнхийлөгч асан Луис Инасиу Лула да Силва-д тус улсын шүүх авлигын хэргээр 9,5 жилийн хорих ял оноосон байна.
Ерөнхийлөгч асан болон түүний эхнэр хоёр Гуаружа гэдэг амралт сувиллын хотод тансаг харштай гэдгээ хөрөнгө орлогын мэдүүлэгтээ дурдаагүй аж. Түүнээс гадна барилгын ОSA гэдэг компаниас 747,8 мянган долларын хахууль авч, үүнийхээ хариуд төрийн өмчийн Petrobras компанитай хэлцэл байгуулахад нь ОSA-д дэмжлэг үзүүлэхээр амласан байжээ.
Луис Инасиу Лула да Силва Бразилын Ерөнхийлөгчөөр 2003-2010 оны хооронд хоёр бүрэн эрхийн хугацаанд ажилласан бөгөөд улс орондоо маш их нэр хүндтэй хүн юм.
Гэвч 2014 онд Бразилын прокурорын газар “Авто угаалгын газар” гэдэг тусгай ажиллагаа явуулж, Petrobras компанийн зүгээс төрийн өндөр албан тушаалтнуудыг хахуульдаж байсан хэргийг мөрдөн шалгаж эхэлсэн байна.
Мөрдөлтийн явцад, хэдэн арван томоохон бизнесменүүд, Ажилчны намын албан тушаалтнууд холбогдсон олон тэрбум долларын авлигын сүлжээг илрүүлжээ. 2016 онд Лула да Силваг энэ хэрэгт холбогдуулан баривчилсан боловч тухайн үед Ерөнхийлөгч байсан Дилма Руссеф түүнийг Ерөнхийлөгчийн Тамгын газрын даргаар томилсон учраас да Силваг эрүүгийн хэрэгт холбогдуулан шалгахыг зогсоосон юм. Гэвч 2016 оны 8 дугаар сард Дилма Руссеф албан тушаалаасаа огцорсноор да Силваг дахин шалгажээ.