Монгол үндэсний бөхийн барилдаан найраатай болдог гэх яриа бий. Наадмын барилдааны гурвын даваанаасаа эхлээд найраа ид хийгдээд эхэлдэг. Өнгөрсөн пүрэв гаригт болсон УИХ-ын чуулганаар Биеийн тамир, спортын тухай хуулийн шинэчилсэн найруулгын төслийг баталсан. Хуулийн төслийг батлах үеэр монгол бөхийн барилдааны үед хийгддэг давааны найрааг таслан зогсооход энэхүү хууль нөлөөлж чадах эсэх талаар яриа өрнөсөн.
УИХ-ын гишүүн Ж.Батзандан хэлэхдээ “Үндэсний бөхөд шударга өрсөлдөөн алга болоод удаж байгаа. Улсын начин болохын тулд, цол ахихын тулд цүнхэндээ мөнгөө хийгээд явдаг байдал энэ хууль хэрэгжсэнээр байхгүй болно гэж ойлгож байгаа. Тийм учраас Эрүү болон Зөрчлийн хуульд зохих өөрчлөлт оруулах шаардлагатай, энэнд анхаараарай” гэж хэлсэн.
_700.jpg)
УИХ-ын гишүүн А.Сүхбат “Чамбай сайхан хууль болж байгаа. Үндэсний бөхийн төлөөлөгч нь болж явдаг хүний хувьд энэ хууль хэрэгжсэнээр үндэсний спортод үр хүүхдээ хүмүүжүүлэх талд дорвитой ажил хийгдэнэ гэж харж байгаа. Бусад орон хуульдаа спортын авлигыг тодорхой зааж өгсөн байдаг. Авлига авч болохгүй, өгч болохгүй, зуучилж болохгүй. Сүүлийн үед үндэсний спорт их гажуудсан. Үүнээс болж, ард олны дунд үндэсний бөхийн нэр хүнд унах, залуучуудын хүмүүжил гажуудах байдал үүссэн. Нэг сайхан өндөр биетэй залуу жижигхэн хүүхдэд унаад өгдөг. Ийм утгагүй юмыг үзээд гутаж байна гэж ярьдаг. Сумын наадамд түрүүлэхэд 5 сая, аймгийн наадамд түрүүлэхэд 50 сая, улсын начин цол авахад 500 сая гэдэг зүйлийг ард иргэд ярьдаг болжээ. Хээл хахууль авч даваа наймаалцсан бөхөд нэг ч хариуцлага тооцолгүй явж ирсэн” гэдгийг хэлж байсан юм.
Түүчнлэн Спортын авлига хээл хахууль, даваа наймаалцдаг асуудалд хариуцлага тооцохтой холбоотой заалт энэ хуульд орсон уу гэсэн асуултад
Боловсрол, соёл, шинжлэх ухаан, эрүүл мэндийн дэд сайд Ё.Отгонбаяр “Авлигын эсрэг хуульд төрийн өмчийн удирдлага гэх мэт тодорхой албан тушаалтан хамаарагддаг учраас Спортын тухай хуульд шударга өрсөлдөх, үүрэгтэй гэж зааж өгөөд, спортын холбоодуудад тухайн спортын тэмцээний үр дүнд нөлөөлөхүйц хэмжээнд хийсэн үйлдэл, эс үйлдэл гаргасан нөхцөлд тухайн тамирчны тэмцээнд оролцох эрхийг хасах боломжтой байхаар заалт орсон” гэж хариулсан. Энэ нь бөхийн барилдааны замбараагүй гаарсан найрааг таслан зогсооход цочрол өгөхүйц заалт хуульд ороогүй гэдгийг илтгэнэ.
Хуульд тусгаснаар шударга өрсөлдөх үүрэгтэй гэж зааж, тухайн тамирчны тэмцээнд оролцох эрхийг хасах төдий хариуцлага тооцох юм байна. УИХ-ын гишүүн Ж.Батзандангийн хэлж байсанчлан шиг Эрүү болон Зөрчлийн тухай хуульд зохих өөрчлөлт орж, хоригдох, ял шийтгэл оногдуулах хэмжээний хатуу чанга шийтгэл орсонгүй гэлцэж байна. Ийнхүү том цолтой бөхчүүд аймаг, сумдын наадмыг хэрэн хэсч, наадам өндөрлөөгүй байхад том, том машинаа унаад дараагийн наадам руу довтолгож өгдөг дүр зураг өөрчлөгдөхгүй нь бололтой.
Б.ОДМАА