Хүчингийн хэрэгт холбогдоод байгаа УИХ-ын гишүүн Д.Гантулга өнөөдөр Төрийн ордонд мэдээлэл хийлээ. Тэрбээр “Нэр нь тодорхойгүй хаягаас, нэр ус нь тодорхойгүй хүний тухай мэдээлэл цацагдахаас эхлээд явсаар байгаад өнөөдөр Гантулга гэдэг УИХ-ын гишүүн хүчингийн хэрэгт холбогдсон мэтээр мэдээлэл цацагдаад нэлээдгүй цаг хугацаа өнгөрлөө. Хүмүүс надаас “Та яагаад энэ мэдээллийг 20-иод хоног үргэлжлэх хугацаанд, мэдээлэл хийхгүй, хариу өгөхгүй удсан юм бэ, та өөрөө буруутай юм биш үү” гэж асуусан. Нэгд, хоёр хоногийн өмнө буюу долдугаар сарын 3-ны өдөр энэ мэдээллийг цацаж байгаа албан ёсны эх сурвалж мэдээллийг хийлээ. Тийм учраас би орон нутагтаа ажиллаж байгаад өчигдөр ирээд өнөөдөр энэ мэдээллийг хийж байгаа юм. Ер нь өнгө мөнгөнд, үнэ цэнэ, хүн чанараа худалддаг үеийн залуучуудын эрх ашиг бүхэл бүтэн нэг үеийг, өөрчилж шинэчлэх нийгмийн сэтгэл зүйн өмнө бид ирсэн байна. Иймээс одоо бид юунд итгэх вэ гэсэн асуултанд тулаад байгаа юм. Анх зургадугаар сарын 12-ны өдөр Гантулга гэх хүнд холбогдох хүчингийн хэргийн мэдээлэл, гомдол гарсан байдаг, 13-ны өдөр энэ гомдлоо эргүүлэн татсан байдаг. Гэхдээ би хуулийн байгууллагад энэ хэргийг ямар байдлаар явах ёстой тэр бүгдийг нь үргэлжлүүлэн шалгаж өгөөч, би мэдээллээ өгье гээд зургадугаар сарын 19-ний өдөр цагдаагийн байгууллагад очиж мэдүүлэг өгсөн. Мөн дээрээс нь шүүх эмнэлгийн дүгнэлт гарсан. Ингээд эцэст нь зургадугаар сарын 21-ний өдөр “Энэ хэргийг хэрэгсэх үндэслэл байхгүй” гэсэн прокурорын дүгнэлт гарсан.
Би прокурорын байгууллагаас “Мэдээллээ авъя” гэсэн боловч мэдээллийг зөвхөн анхны өргөдөл гаргасан хүнд эхэлж өгнө гэсэн хуулийн үндэслэлээр надад өгөөгүй. Ингээд 6 сарын 29-ний өдөр энэ мэдүүлгийг би авсан. Энэ мэдүүлэгт долоо хоногийн дотор анх гомдол гаргагч дараагийн шатны прокурорт буюу Нийслэлийн прокурорын газарт дахин санал гаргах эрхтэй гэсэн байсан. Энэ цаг хугацаа нөлөөлсөн. Дараагийн шатны прокурорт хэргийг өгч байгаа юм байна. Намайг мэдээлэл цаг тухайд хийхгүй байна гэсэн. Би цаг хугацаандаа мэдээллээ өгөөд явж байгаа. Харамсалтай нь энэ мэдээлэл одоо мушгигдаад байгаад харамсаж байна. Үндсэндээ энэ мэдээлэл бол оффшор дансны тухай задалсан мэдээлэлтэй зэрэгцээд Medee.mn дээр гарч эхэлсэн. Цэвэр АН-ын хэвлэл мэдээллийн хамаарал бүхий байгууллагуудын дэмжлэгтэйгээр, дээр нь АН-ыг дэмжиж байгаа бүхий л сонгуулийн штабын нөхдүүдийн лайваар энэ мэдээллийг цацаж байгаа нь илэрхий улс төр харагдаж байгаа юм. Зургадугаар сарын 21-ний өдөр Гантулгад холбогдох энэ асуудлыг хэрэгсэх шаардлагагүй гэсэн байхад өнөөдөр мэдээлэл хийгээд байгаа Саранзаяа Хөвсгөл далайн эрэг дээр амраад явж байсан. Ингээд уржигдар мэдэгдэл хийхдээ уйлан хайлан мэдэгдэл хийсэн. Маргааш нь уулзахад эмнэлэг дээр маш тайван ярилцаж байгааг та бүхэн харж байгаа. Өчигдрийн хэвлэлийн бага хурлаар “Надад мөнгө өгсөн, ахиад мөнгө өг” гэсэн утгатай хэвлэлийн бага хурал хийж байгаа. Энэ бол шантааж. Би хэн нэгэнд мөнгө өгөх нь битгий хэл өөрөө орон сууцны түрээсийн байранд амьдарч байна” гэх мэдээллийг хийлээ.