Монгол Улсын Ерөнхийлөгчийн сонгуулийн үйл явцыг гадаад, дотоодын 18 мянга гаруй ажиглагч ажиглаж байна. Дэлхийн 37 улсаас 123 ажиглагч ирсэн гэх мэдээллийг Сонгуулийн ерөнхий хорооноос өгөөд байгаа юм. Европын Парламент, Европын Аюулгүй Байдал, Хамтын Ажиллагааны Байгууллага тэргүүтэй олон улсын байгууллага, институцээс ажиглах тусгайлсан багууд энэ удаагийн Монгол Улсын Ерөнхийлөгчийн сонгуулийн үйл явцад ажиглалт хийж байна. Мөн Дэлхийн сонгуулийн байгууллагуудын холбооны төлөөлөгчид болон Азийн сонгуулийн байгууллагуудын холбооны дарга ирж, сонгуулийн үйл явцад ажиглалт хийж байгаа гэсэн мэдээлэл байна. Монгол Улс сонгуулийн автоматжуулсан системийг ашиглаж буй нь олон улсад сайн туршлага гэж ажиглагчид олзуурхаж байгаа гэнэ. Ажиглагчдын хувьд санал хураалтын дүнг олон нийтэд мэдээлэх явц, бусад асуудлаар туршлага солилцох сонирхолтой байгаа аж.