Хан-Уул дүүрэгт байрлах “Говь” ХК”-ийн үйлдвэрийн барилгад энэ сарын 14-ний өдөр гал гарч, дээврийн хэсэг бүрэн шатсан билээ. Галын тархалт их, барилга байгууламжийн талбай том, дээврийг нь шилэн хөвөн, хар цаас, мод гэсэн шатамхай материалаар хийсэн байсан тул галын тархалт эрчимжиж, галыг бүрэн унтраахад хүндрэлтэй байсан юм. Галыг 250 гаруй хүний бүрэлдэхүүнтэй баг ажиллан бүрэн унтраасан.
Тэгвэл тус компанийнхан галд өртөж шатсан дээврийн хар цаасан хучилтын хэсгийг өчигдөр оройн 18 цагийн байдлаар бүрэн засварлаж дуусгажээ. Өнөөдөр үйлдвэрлэлийг хэвийн ажиллагаанд оруулахаар ажиллаж байгаа аж.