МАХН-аас Ерөнхийлөгчийн сонгуульд нэр дэвшиж буй С.Ганбаатарын сонгуулийн штабаас өнөөдөр мэдээлэл хийлээ.
Өчигдөр 00:00 цагийн орчимд үл таних этгээд нэр дэвшигч С.Ганбаатарын эхнэр н.Тунгалагийн нэрээр илгээмж авчирч өгсөн байна. Гэрийн хаягаар нь илгээмж хүргэж ирсэн этгээд өөрийгөө таксины жолооч гээд үл таних хүн оруулаад өгөөч гэж хэлсэн хэмээн мэдүүлжээ. Тухайн үед н.Тунгалагийн төрсөн дүү нэр дэвшигчийн гэрт байсан аж.
Тэрбээр танихгүй хүнээс ирсэн илгээмжийг авахгүй гээд буцаасан ч 15 минутын дараа дахин хаалгыг нь тогшсон гэв. Ингээд Төрийн тусгай алба болон цагдаагийн байгууллага руу дуудлага өгснөөр таксины жолооч гэх иргэнийг баривчилсан байна. Харин илгээмжид гурван ширхэг капсултай зүйл байжээ. Түүнийг шинжлэхээр холбогдох албаныхан аваад явсан аж. МАХН-ын гишүүн Н.Тулгын хэлснээр “Тэр илгээмж дотор байсан зүйл юу болохыг бидэнд одоог хүртэл мэдээлэхгүй байна. Тиймээс хууль хяналт болон прокурорын байгууллагаас илгээмж доторхи зүйл юу байсныг харуулахыг шаардаж байна” гэлээ.
Уг зүйлийг өнөөдөр шүүх шинжилгээний байгууллага шалгасан гэх мэдээллийг өгч байв.