Өнөөдөр Олон улсын олимпийн өдөр. Олон улсын олимпийн хорооны гишүүн 206 оронд энэхүү баярыг тэмдэглэж байна. Францын соён гэгээрүүлэгч, их бичгийн хүн Пьер Кубертэн Парис хотын Сорбоны их сургууль дээр хэсэг нөхдийн хамт Олон улсын олимпийн хороо (IOC)-г үүсгэн байгуулж, орчин цагийн олимпийн наадмыг сэргээх түүхэн шийдвэр гаргасан энэ дурсгалт өдрийг хүн төрөлхтөн Олон улсын олимпийн өдөр хэмээн мөнхөлсөн юм. 1948 оны Лондоны олимпийн жилээс эхлэн Олон улсын олимпийн өдрийг тэмдэглэжээ. Монгол Улс 1964 оноос олимпийн наадамд оролцож эхэлсэн ба 1968 онд олимпийн наадмаас монгол хүн анх удаа медаль хүртсэн юм. Монголын үндэсний олимпийн хороо нь 1956 онд байгуулагдаж, 1962 онд Олон улсын олимпийн хорооны гишүүн болжээ.