Монголын Хөлбөмбөгийн холбооны “Хүрхрээ үндэсний дээд лиг”-ийн зургаа дугаар тойргийн нөхөн тоглолт өчигдөр боллоо. “Хүрхрээ” үндэсний дээд лигийн тэргүүлэгчдийн эгнээнд бичигдэж буй “Эрчим”, “Атлетик 220” клубүүдийн сонирхолтой тоглолтод “Эрчим” 3:2-оор хожсон юм. Үндэсний лигийн арван удаагийн аварга Эрчим одоо 19 оноотой болж, ардаа яваа багаас дөрвөн онооны илүүтэй хүснэгтийг тэргүүлж байна.
“Хүрхрээ үндэсний дээд лиг”-т дараалан түрүүлээд байгаа “Эрчим” талбайдаа “Атлетик 220”-ыг хүлээн авсан нь тэргүүлэгчдийн өнгийг тодорхойлох чухал ач холбогдолтой байсан. Гэтэл талбайн эзэд 17, 20, 23 дахь минутад дараалан гоол оруулж, нүд ирмэхийн зуурт 3:0-ээр илүүрхээд эхэлсэн. Тэрхүү давамгайлыг франц довтлогч Николас Ванделли, өнгөрсөн жилийн лигийн шилдэг хагас хамгаалагч М.Төгөлдөр, лигийн мэргэн буучдын төлөө хүчтэй өрсөлдөөн үзүүлдэг япон легионер Шута Ишино нар зургаахан минутад багтаан олгосон юм.
Нэгдүгээр үед “Атлетик 220” клубийн япон хагас хамгаалагч Чикара Таширо өөрт олдсон боломжийг алдсанаар эхний хагас 3:0-ээр өндөрлөсөн. Уг үр дүнгээр тоглолт өндөрлөх дөхөөд байх үед Шута Ишино 11 метрийн торгуулийн цохилт гүйцэтгэн алдав. Түүний ашиглаж чадаагүй боломжийн хариуг Ч.Бат-Эрдэнэ 87, Н.Наранболд 90 дэх минутад шийтгэж, тооны харьцааг 3:2 болгон ойртуулсан. Гэсэн ч дахин нэг гоол оруулан, оноо авахад хангалттай хугацаа байсангүй. Талбайн эзэд 3:2-оор хожиж, ардаа яваа багаас дөрвөн онооны илүүтэй хүснэгтийг тэргүүлээд эхэллээ.
