УИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаанаар Засгийн газраас өргөн мэдүүлсэн Нялх, балчир хүүхдийн хоол, хүнсний бүтээгдэхүүний тухай хуулийн шинэчилсэн найруулгын төслийг хэлэлцэн дэмжсэн билээ. 2005 онд баталсан Эхийн сүү орлуулагч бүтээгдэхүүний тухай хуулийн төслийг цаг үеийн шаардлагад нийцүүлэн шинэчлэн боловсруулсан. Тэгвэл Эрүүл мэндийн сайд А.Цогцэцэг өнөөдөр Нялх балчир хүүхдийн хүнсний тухай хууль батлагдсантай холбогдуулан ард иргэдэд буруу ташаа ойлголт төрөөд байгаад хариу тайлбар хэвлэлийн бага хурлыг хийлээ. Тэрээр “Эхийн сүү орлуулагчийн тухай хууль 2015 онд батлагдсан байдаг. Энэ хуулийн шинэчилсэн найруулга өнөөдөр нялх балчир хүүхдийн хүнсний тухай хууль гэсэн нэртэйгээр орж байгаа. Өмнөх хууль маань өнөөдрийн цаг үед хэрэгцээ шаардлага хангахгүй байна. Нялх балчир хүүхдийн 0-6 сартай хүүхдийг хөхөөр дагнан хооллох хэрэгтэй. 0-6 сартай хүүхдийг эхийн сүүгээр дагнан хооллох нь манай эрүүл мэндийн салбарын болон дэлхий нийтийн бодлого байгаа.
Эхийн сүүгээр хооллолтын түвшин 1990 онд 90 хувьтай байсан. Бид тэр үед дэлхийд жишээ болж байсан. 2005 онд 56 хувь байсан бол өнөөдөр 47 хувь байна. Хэрэв 40 хувиас доош болоод ирвэл Дэлхийн эрүүл мэндийн байгууллагаас гаргасан онц байдал руу ордог. Эхийн сүүгээр хооллоогүй хүүхдүүд суулгалт, ханиад хатгаа, ходоод хоол боловсруулах эрхний хямралд хамаагүй илүү өртөмтгий байдаг. Жишээлбэл, өнгөрсөн жил короор нас барсан хүүхдүүдийн 70 гаруй хувь нь эхийн сүү орлуулагч хэрэглэдэг байсан. Хөх нь цатгаж чадахгүй байгаа хүүхдэд эмчийн заавар зөвлөмжийн дагуу эхийн сүү орлуулагч хэрэглэж болно. Харин байгаа юм” гэлээ.
Мөн эхийн сүү орлуулагч импортоор ямар ч хяналтгүй орж ирж гоо сайхны дэлгүүр, барилгын материалын дэлгүүр, зах гээд эрүүл мэндийн шаардлагад нийцээгүй газруудаар зарагдаж байгааг цэгцлэх бодлого бий гэсэн юм.