Монгол Улсын Ерөнхийлөгчийн сонгуульд МАН-аас нэр дэвшигч М.Энхболд, АН-аас нэр дэвшигч Х.Баттулга нарыг Сонгуулийн ерөнхий хороо бүртгэсэн. Харин МАХН-аас нэр дэвшигч С.Ганбаатарыг СЕХ бүртгэх эсэхийг өнөөдөр хэлэлцэнэ.
Улмаар Монгол Улсын Ерөнхийлөгчийн 2017 оны сонгуульд нэр дэвшигчийг улсын хэмжээнд албан ёсоор зарлана. Гэхдээ МАХН-аас нэр дэвшигч С.Ганбаатарыг УИХ-ын гишүүн О.Баасанхүү дэмжихгүй байгаагаа илэрхийлсээр байгаа.
Тэрбээр “МАХН-ын Бага чуулганаар олонхийн саналаар Босоо гэгддэг Ганбаатарыг дэмжсэн гэдгийг дууллаа. Өчигдөр оройг хүртэл С.Ганбаатар руу залгаад МАХН-аас нэр дэвших үү гэдэг асуудлыг ярьж байсан.
Миний хувьд намын Бага чуулганд өөрийн байр суурийг илэрхийлж байсан. Төрийг барих зангарагтай, хуулийг ясчлан биелүүлэх, нэр цэвэр хүн нэр дэвшээсэй гэж хүсэж байсан. Нам дээр ирээд нэг цаг 30 минутад сэтгэлийн хөөрлөөр нэр дэвшье гэж хэлсэн хүнийг дэмжих тухай ойлголт байхгүй. Намын харьяаллын хувьд МАХН, дорж хаяж нам бус гэдгээ баталгаажуулсан хүн байх ёстой гэж ойлгож байгаа.
Боловсролын талаас харвал гавьяат хуульч, доктор профессор С.Нарангэрэл гэдэг хүний нэрийг оруулж ирж байсан. УИХ-ын гишүүнээр ажиллаж байсан гээд дурьдвал нэлээд туршлагатай улстөрч. Гэтэл дээд боловсролтой эсэх гадаадад сурч байсан эсэхээ худлаа тавьж байсан гээд хэвлэлээр бичигдэж байсан ийм хүнийг Ерөнхийлөгчид нэр дэвшүүлэх нь буруу гэж бодож байгаа.
Хуульзүйн хувьд ч боломжгүй, Үндсэн хуулийн хувьд ч боломжгүй гэж харж байна. Би УИХ-д сууж байгаа намын гишүүний хувьд байр сууриа илэрхийлж, нэр дэвшигчийг дэмжихгүй багаагаа илэрхийлж байна.
Намайг улстөрийн хөдөлгөөн хийх нөхцөл байдалд битгий хүргээсэй. Хатуухан хэлэхэд намаасаа гарах нөхцөл байдал руу МАХН-ын удирдлагууд битгий түлхээсэй гэж хүсэж байна” гэлээ.
Хэрэв УИХ-ын гишүүн О.Баасанхүү намаасаа гарвал МАХН энэ удаагийн Ерөнхийлөгчийн сонгуульд өрсөлдөх боломжгүй болох юм. Өнөөдөр энэ талаар 11:30 цагаас Төрийн ордонд мэдээлэл хийхээр болжээ. Түүний өчигдөр хийсэн бичлэгийг бүрэн эхээр нь хүлээн авч үзнэ үү.