Монгол Улсаас НҮБ-ын Вена дахь төвийн дэргэд суух Байнгын төлөөлөгч Г.Баттунгалаг НҮБ-ын Вена дахь төвийн Ерөнхий захирал Юрий Федотовт 2017 оны 5 дугаар сарын 10-ны өдөр Итгэмжлэх захидлаа өргөн барив.
Итгэмжлэх захидлаа барьсантай нь холбогдуулан Ерөнхий захирал Ю.Федотов Байнгын төлөөлөгч Г.Баттунгалагийг хүлээн авч уулзаж, хамтын ажиллагааны асуудлаар ярилцлаа.
Монгол Улс болон Вена-д төвтэй НҮБ-ын салбар байгууллагууд хоорондын хамтын ажиллагааны түвшин, бодит үр дүнг ахиулан өргөжүүлэхийг зорьж ажиллахаа Байнгын төлөөлөгч тэмдэглэж, энэ чиглэлд Ерөнхий захирал дэмжлэг туслалцаа үзүүлнэ гэдэгт итгэж буйгаа илэрхийлэв.
Хамтран хэрэгжүүлж буй төсөл хөтөлбөрийн үр өгөөжийг нэмэгдүүлэх, цар хүрээг нь тэлэхэд Нарийн бичгийн дарга нарын газраас бүх талын дэмжлэг үзүүлнэ гэдгээ Ерөнхий захирал уулзалтын үеэр нотлов.