УИХ-ын чуулганы өнөөдрийн хуралдаанаар Хууль тогтоомжийн тухай хуульд нэмэлт, өөрчлөлт оруулах тухай хуулийн төслийг хэлэлцэж, баталлаа. Хууль зүйн байнгын хорооны өнөөдрийн хуралдаанаар тус хуулийн нэмэлт өөрчлөлтийг хэлэлцэх үеэр анхны хэлэлцүүлгээр нь батлах горимын санал гаргасан нь дэмжигдсэн юм. Чуулганы хуралдаанаар хуулийн төслийг эхний шатанд нь 73.9 хувийн саналаар баталлаа.
Сануулахад, Хууль тогтоомжийн тухай хууль нь оны эхнээс хэрэгжиж буй. Уг хууль хэрэгжиж эхэлснээр хуулийг боловсруулахаас эхлээд бүх шат дамжлагыг хуульчилж өгсөн давуу талтай. Гэвч зарим шаардлагатай засварыг хийх нь зүйтэй хэмээн үзсэн тул УИХ-ын гишүүн Х.Нямбаатар хоёр хоногийн өмнө өргөн мэдүүлсэн юм.
Тухайлбал, Хууль тогтоомжийн тухай хуулийн 26 дугаар зүйлийн 26.1 дэх хэсэгт багц хуулийн төслийг зөвхөн Засгийн газар боловсруулж, өргөн мэдүүлж болохоор заасан нь Монгол Улсын Үндсэн хуулийн Хорин зургадугаар зүйлийн 1 дэх хэсэгт заасан Ерөнхийлөгч, Улсын Их Хурлын гишүүний хууль санаачлах эрхийг хязгаарлаж байна хэмээн үзжээ.