ЭМЯ, Эрүүл мэндийн салбарынхан өнөөдөр Сүхбаатарын талбайд “1000 цагаан нөмрөгтөн” нээлттэй хаалганы өдөрлөг зохион байгууллаа. Энэхүү өдөрлөгийн хүрээнд ЭМЯ-ны харьяа төрөлжсөн мэргэжлийн төвүүд, НЭМГ болон I, II, III шатлалын эрүүл мэндийн байгууллагууд үйл ажиллагаагаа сурталчлан иргэдэд үзлэг хийн зөвлөгөө өгч байлаа.
Тухайлбал, чихрийн шижин, ясны сийрэгжилтийг тусгай аппаратаар оношилж, судас барин зөвлөгөө өгч байлаа. Хүмүүст илүү эрэлт хэрэгцээтэй иймэрхүү нарийн үзлэг, зөвлөгөөг өгч байсан нь иргэдийн талархлыг хүлээж уртаас урт дараалал үүсгэж байв. Харин уламжлал болсон даралт, жин үзэх зэрэг үйлчилгээн дээр хүмүүс бага байсан юм.
Эдгээр төрөл бүрийн зөвлөгөөнүүдийг нээлттэй хаалганы өдөрлөгөөр хүргэж буй гол шалтгаан нь өвчилсөн үед эмнэлэгт үзүүлэх бус өвчнөөс урьдчилан сэргийлж чадвал хүн бүр эрүүл амьдарч, ихийг бүтээх боломж буйг ойлгуулах юм.
Энэхүү өдөрлөгийн хүрээнд Зоонозын өвчин судлалын үндэсний төв Зоонозын халдвараас урьдчилан сэргийлэх мэдээлэл сурталчилгааг мөн иргэдэд өгч байв. Мал, амьтны гаралтай халдварт өвчнөөс хэрхэн сэргийлэх талаарх зөвлөгөөг амьтдын чихмэл дээр тайлбарлан хүргэж байгаа нь хөгшид, хүүхдийн сонирхлыг ихэд татаж байв.
О.ӨНӨР