Монгол Улсын гавьяат тамирчин, олимп, ДАШТ-ий мөнгөн медальт Н.Төгсцогт энэ сарын эхээр мэргэжлийн боксын ринг дээр ээлжит тулаанаа хийж, өрсөлдөгчөө хүнд цохилтоор ялж, анхны аваргын бүсээ гардан авлаа.
Тэрээр таван ялалт дараалан байгуулсан амжилтаар “State Champion” цол хүртсэн бөгөөд одоогоор мэргэжлийн боксын рингэнд нэг ч ялагдаагүй байгаа юм. Монголын боксын спортын түүхэнд өөрийн түүхийг бичиж яваа шилдэг боксчин Н.Төгсцогт 2009 онд 17 насандаа сонирхогчдын боксын дэлхийн аварга шалгаруулах тэмцээнээс мөнгө, 20 насандаа “Лондон-2012” зуны олимпийн наадмаас мөнгөн медаль хүртсэн юм.
Гавьяат тамирчин Н.Төгсцогт “Инчеон-2014” Азийн наадмын дараа мэргэжлийн бокст шилжиж АНУ-д бэлтгэл сургуулилтаа хийж байгаа билээ.