Бөөрний өвчтэй хэмээн оношлогдсоноор нөхөртөө хаягдаж, хоёр охинтойгоо гэрийнхээ буурин дээр хаягдсан Г.Цагаандарийн талаар манай уншигчид андахгүй биз ээ. Өнөөдрөөс яг сарын өмнө тэрээр хоёр охиноо дагуулан Толгойтын өртөөнд хоног төөрүүлж байсан билээ.
Тэгвэл Г.Цагаандарь өнгөрсөн хугацаанд өвчнөө эмчлүүлээд зогсохгүй өөрийн гэсэн хашаа байшин, гэртэй боллоо. Үүгээр ч зогсохгүй тэрээр ИНЕГ-т ажилд орох болсон.
Тэднийг Толгойтын өртөөнд хоног төөрүүлэн явахад “Итгэл сэтгэлийн гүүр” сангийн залуус уулзаж, түүнд туслах хандивын аяныг орон даяар эхлүүлсэн юм. Энэ хугацаанд хандивын дансанд 15 сая гаруй төгрөг цугларсан бөгөөд ард түмний хандиваар цугларсан уг мөнгөөр “Итгэл сэтгэлийн гүүр” сангийн залуус Г.Цагаандарь болон түүний бяцхан охидод хашаа байшин худалдан авч, засварлан энэ сарын 20-ны өдөр хүлээлгэн өгсөн юм.
Тэгвэл Нийгмийн хариуцлагынхаа хүрээнд “Од Групп” компани Г.Цагаандарь бүсгүй болон түүний гэр бүлд бүтэн жилийн хэрэглээ болох Ургац гурилыг хүлээлгэн өгчээ.