“Аюулгүй, гамшигт тэсвэртэй хот” НҮБ-ын санаачлагад Улаанбаатар хот, Дархан-Уул, Орхон аймгууд нэгдэн орсон байна. Тус санаачлагад заасан зайлшгүй шаардлагатай 10 үндсэн чиглэлийг хэрэгжүүлэхийн тулд стратеги, төлөвлөгөө боловсруулан ажилладаг ажээ. Уг ажлын хэрэгжилтийг ханган ажиллахад чухал үүрэгтэй сургалт ОБЕГ-т эхэллээ. Онцгой байдлын ерөнхий газар, НҮБ-ын Гамшгийн эрсдэлийг бууруулах Зүүн хойд Азийн бүсийн төв, Гамшгийн эрсдэлийг бууруулах дэлхийн боловсрол, сургалтын хүрээлэнтэй хамтран Монгол Улсад “Гамшгийн эрсдэлийг бууруулах Сендайн үйл ажиллагааны хүрээ баримт бичгийг орон нутгийн түвшинд хэрэгжүүлэх”, “Аюулгүй, гамшигт тэсвэртэй хот” НҮБ-ын санаачлагыг хэрэгжүүлэх чиглэлээр цуврал сургалтыг зохион байгуулж байна.
2017 оны 04 дүгээр сарын 10-14-ний өдрүүдэд “Гамшгийн эрсдэлийг бууруулах Сендайн үйл, ажиллагааны хүрээ баримт бичгийн хэрэгжилтийг орон нутгийн түвшинд хангах, гамшгийн эрсдэлийг үнэлэх нь” сэдэвт II шатны сургалт Онцгой байдлын ерөнхий газарт болох юм.
Энэ удаагийн II шатны сургалтад Нийслэлийн Онцгой байдлын газар, Дархан-Уул, Орхон аймгийн Онцгой байдлын газрын албан хаагчид болон гамшгаас хамгаалах улсын албадын нийт 26 оролцогч хамрагдаж байна.
Албан хаагчид сургалтын үеэр эрсдэлийг тооцоолох түргэвчилсэн аргад суралцахын зэрэгцээ цаашид орон нутгийн гамшгаас хамгаалах төлөвлөгөөндөө тусган ажиллана гэж Онцгой байдлын ерөнхий газраас мэдээллээ.