Хүүхэд багачуудын унших дуртай “Бумбардай” зурагт номын зохиолч, Монгол манга зураач Н.Эрдэнэбаяр Японы “Wedge Holdings” компанитай хамтран ажиллах гэрээнд гарын үсэг зурлаа. Энэхүү үйл ажиллагаа өнөөдөр Blue Sky зочид буудалд болсон юм.
Н.Эрдэнэбаярын “Бумбардай” цуврал нь 2015 онд Японы Гадаад яамнаас зохион байгуулдаг “Олон Услын Манга Авардс”-аас “ГранПри” шагналыг хүртсэн юм. 2004 оноос манга зураг зурж эхэлсэн бөгөөд 2005 онд “300 хүнтэй Тайжууд” номоороо анхны гараагаа эхэлж байжээ. Үүний дараа 2011 онд түүний бүтээсэн “Бонго” хүүхэлдэйн дүр нь олонд танигдаж, хүүхэд багачуудын хайртай дүр болсон юм. Түүний бүтээл Монголын нүүдэлчин угсааны аж амьдрал болоод түүх, үндэсний бахархал, зан заншлыг хойч үедээ өвлүүлж, дэлхий нийтэд таниулах зорилгыг шингээсэн байдгаараа онцлогтой.
Wedge Holdings компанийн ерөнхий захирал Коношита Тацуяа: “Манай компанийн хувьд 30 жилийн турш контентийн үйл ажиллагаа явуулж байна. Азийн зургаан улсад энэ төрлийн хамтын ажиллагааг хийнэ.
Энэхүү гэрээ бол олон улсын уран бүтээлчидтэй хийж буй анхны гэрээ гэж хэлж болно.
Бид маш олон улсад бизнесийн үйл ажиллагаа явуулдаг. Тэдгээр улсад бид Н.Эрдэнбаярыг алдаршуулах болно. Н.Эрдэнэбаярын бүтээл Ази тивийн хоёр тэрбум хүний зүрх сэтгэлийг татна гэдэгт итгэлтэй байна.
Н.Эрдэнэбаярыг бүтээлээ зарж борлуулах гэхээс илүү өөрийн зүрх сэтгэлдээ байгаа авьяасыг гаргаасай гэж хүсэж байна. Бүтээл гэдэг бол зөвхөн мөнгө биш хүсэл эрмэлзэл юм. Энэхүү гэрээ түүнийг уран бүтээлээ сайн хийхэд л зориулагдах болно” хэмээв.