Элсэлтийн ерөнхий шалгалтын бүртгэл хоёрдугаар сарын 1-ний өдрөөс эхэлсэн. Одоогоор улсын хэмжээнд бүртгэлийн ажил 80.5 хувьтай явагдаж байна гэдгийг Боловсролын үнэлгээний төвөөс мэдээллээ.
Энэ оны байдлаар улсын хэмжээнд ерөнхий боловсролын сургуулийн 12 дугаар ангийг төгсөж байгаа 37.000 гаруй сурагч байна. Үүн дээр гадаадад төгсөж байгаа болон өмнөх оны төгсөгчидтэй нийлээд 40.000 гаруй сурагч элсэлтийн ерөнхий шалгалт өгөх юм.
Элсэлтийн ерөнхий шалгалт өгч байгаа сурагчид өмнө нь орос хэл, англи хэл, монгол хэлний шалгалтын тестийг бөглөдөг байсан бол энэ жилээс эхлэн сонсох чадварын шалгалтыг давхар өгөхөөр болсон. Энэ жилийн ЭЕШ-ын бүртгэл энэ сарын 14-ны 18:00 цаг хүртэл онлайнаар хийгдэх бөгөөд шалгалт эхэлтэл дахин нэмэлт бүртгэл хийх боломжгүй гэдгийг БҮТ-өөс анхаарууллаа. Шалгалтын хариуг өгсний дараа шууд сонсох боломжтой болсноороо энэ удаагийн ЭЕШ онцлогтой болж байгаа юм.