Хөдөө томилолтоор очсон дарга нарыг угтаж, үддэг нэг тийм заншил маягийн зүйл тогтоод удаж байна. Төөрсөн хүнд замчлах гэж байгаа юм уу гэлтэй сайд, дарга, албан тушаалтнуудыг очихоор малийтал инээсэн аймаг, сумын дарга нар нутгийн хилийн дээсэн дээр сүр бараатай угтаж авдаг. Бас болоогүй ээ, нутгийн хамгийн сор болсон сайхан бүсгүй нүүрэндээ мишээл тодруулан ирсэн дарга нарт хадаг, сүү барина. Ингэж угтаж, үдэх ёслол хийхгүй байхыг саяхны Засгийн газрын хуралдаанаар шийдэж, аймаг, сумын Засаг дарга нарт үүрэг болгожээ. Зөв шийдвэр байна.
Бензин тос, цаг зав гарздан хорь, гучуулаа хотоос ирсэн дарга, эрх мэдэлтнийг тосох ямар хэрэг байдаг байна аа. Ямар гадаад айлчлал биш дээ. Дотооддоо, түм буман дагуултай, тавь жаран машинтай очиж байхад нь бас нэг жижиг дарга төдий тооны дагуул бараа бологчтойгоо угтаж, улаан хивсний ёслол шиг юм хийх ямар ч хэрэг байхгүй.
Иймэрхүү дүр зураг харахаар “Ховор хүмүүс” кино санаанд буудаг. Киноны гол дүр Дүүриймаа бүсгүй хотоос ирсэн төлөөлөгчийг уяраах үүрэг авч, ирэхэд нь жоготой инээмсэглэлээр угтдаг даа. Одоо цагийн “Дүүриймаа”-нууд яг адилхан.
Ингэж идээ ундаа амсуулж, мэндийн хэдэн үг хэлэхийн төлөө тэгж олон машин хөлөглөж, тийм олуулаа хамаг ажлаа орхиод очдог нь сонин. Угтах, үдэх бараг л адилхан. Машин тэрэг, инээсэн дарга, санаа алдан үлдэх хадаг, сүүтэй сайхан бүсгүй.
Цаашид энэ байдал үгүй болох нь ээ. Нутаг, нутгийн үзэсгэлэн гоо Дүүриймаанууд минь угтаж, үдэх ажилгүй боллоо. Ай хөөрхий Дүүриймаа. Ажилгүй болсон Дүүриймаа…