Өчигдөр Чехийн элчингийн гадаа цагаа цуцлуулсан 30-аад иргэд цуглаж яагаад визэнд орох 200 хүний цагийг цуцалсан талаар хариу өгөхийг шаардсан юм. Тэгвэл тэдгээр иргэдийг тус элчингийн хүмүүс 14:00-16:00 цагийн хооронд хүлээн авч уулзжээ. Тэд тайлбарлахдаа визний цаг авдаг хуудас нь Чех улсын ДЯЯ-ны хяналтанд байдаг гэнэ. Виз авах гэсэн хүмүүсээс нэлээд гомдол гарсантай холбогдуулан программын шинэчлэл хийсэн бөгөөд одоо бол харьцангуй хялбар болсон, имэйл хаягаар визэнд орох цагийг нь өгдөг болсон хэмээн ярив.
Виз нь цуцлагдсан иргэдийн төлөөлөл болсон нэг хүнийг Чехийн элчингийн консулын хэлтэст хүлээн авч уулзжээ. Тэрээр виз нь цуцлагдсан 300-гаад хүний нэр, 70-аад хүний өргөдөл авч орсон байна. Харин Консулын хэлтсийнхэн визний цагийг дахин авахаас өөр аргагүй гээд тэдний өргөдлийг Чех улсын ГХЯ-руу явуулна гэсэн тайлбар өгсөн байна. Тэгэхээр визний цаг авахад төлдөг багагүй долларын хураамжаар иргэд хохироод үлдэж магадгүй болоод байна.
О.ӨНӨР