Үндэсний аюулгүй байдлыг хангах чиг үүрэг бүхий байгууллагуудын дунд болдог уламжлалт “Марш тактик” тэмцээнд цагдаагийн байгууллагын алба хаагчид амжилттай оролцжээ. Аймгуудын цагдаагийн газрын баг ямар амжилт гаргасан талаарх мэдээллийг багцлан хүргэе.
Сэлэнгэ аймгийн Мандал суманд энэ сарын 16-нд зохион байгуулагдсан “Марш тактик тусгай бэлтгэл-2017” аварга шалгаруулах тэмцээнд Сэлэнгэ аймгийн Мандал сум дахь Сум дундын цагдаагийн хэлтсийн баг дэд байрт шалгарсан байна. Тэмцээний тэргүүн байрыг ШШГЕГ-ын харьяа хорих 413-р ангийн баг эзэлжээ.
Харин “Монгол цэргийн өдөр”, Зэвсэгт хүчний 96 жилийн ойг тохиолдуулан зохион байгуулсан Орхон аймгийн Засаг даргын нэрэмжит “Марш тактикийн аварга тасаг шалгаруулах тэмцээн”-д Орхон аймаг дахь Цагдаагийн газрын цагдаагийн дэслэгч н.Мөнх-Эрдэнэ ахлагчтай тасаг гутгаар байр эзэлж, хүрэл медаль, өргөмжлөл, мөнгөн шагналаар шагнуулсан байна.
Булган аймагт Монгол Улсын баатар, хурандаа генарал Г.Лхагвасүрэнгийн мэндэлсний 105 жилийн ой, Монгол цэргийн өдрийг тохиолдуулан “Марш тактик тусгай бэлтгэлийн аварга тасаг шалгаруулах тэмцээн”-ээ явуулжээ. Тус тэмцээнд Булган аймаг дахь Цагдаагийн газрын баг дэд байр эзэлж, мөнгөн медаль, өргөмжлөл, мөнгөн шагнал хүртжээ.