Өнөөдөр Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд дөрвөн настай охиноо хөнөөсөн гэх хэрэгт буруутгагдсан Т.Цогт, хойд эх Г.Маралмаа нарын шүүх хурал болж байна.
Г.Маралмаад дагавар охиноо зодож, биед нь хүнд гэмтэл учруулж, амь насыг нь хөнөөсөн хэмээн үзэж 23 жилийн хорих ялыг чанга дэглэмтэй хорих ангид эдлүүлэхээр шийдвэрлэсэн юм. Харин эцэг Т.Цогтод 24 жилийн хорих ял оноосон ч давж заалдах шатны шүүхээс Т.Цогтын хэргийг хэрэгсэхгүй болгосон юм.
Харин уг шийдвэрийг эсэргүүцэн Г.Маралмаа гомдол гаргаж, Т.Цогттой холбоотой шинэ баримтуудыг хуулийн байгууллагад өгсөн аж. Ингээд Нийслэлийн Давж заалдах шатны шүүх хоёрдугаар сарын 9-ны өдөр хуралдаж Г.Маралмаад оноосон 23 жилийн хорих ялыг хүчингүй болгосон билээ.
Улмаар УМБГ-ын Онц хүнд гэмт хэрэгтэй тэмцэх хэлтсээс энэ хэрэгтэй холбоотой шинэ баримт олдсон хэмээн дахин сэргээж, нягталж шалгасан. Мөрдөн байцаалтын ажиллагаа дууссан учраас хэргийг прокурорын байгууллагаас яллах дүгнэлт үйлдэж шүүхэд шилжүүлсэн байна.