Хүний амь хороосон хэрэгтэнд 10.6 жилийн ял оноолоо

Баянхонгор аймгийн Баянхонгор сумын “Шунхлай” шатахуун түгээх станцын талбайд марган, улмаар цохиж, хүнд гэмтэл учруулан хүний амийг санаатай хөнөөсөн гэмт хэрэг 2016 оны есдүгээр сарын сарын 5-ны өдөр гарсан. Энэ хэрэгт Баянхонгор аймгийн Прокурорын газраас Монгол Улсын Эрүүгийн хуулийн тусгай ангийн 91 дүгээр зүйлийн 91.1 дэх хэсэгт зааснаар буюу “Энэ хуулийн 91.2-т заасан хүндрүүлэх нөхцөл байдалгүйгээр хүнийг санаатай алсан бол арваас дээш арван таван жил хүртэл хугацаагаар хорих ял шийтгэнэ” гэсний дагуу яллах дүгнэлт үйлдэж шүүхэд шилжүүлсэн байна.

Аймгийн Эрүүгийн хэргийн анхан шатны шүүх энэ хэргийг 2017 оны нэгдүгээр сарын 20-ны өдөр хэлэлцжээ. Шүүх хуралдаанаар хэргийг хянан хэлэлцээд зургаан удаагийн ял шийтгэлтэй, хүнд гэмт хэрэгт ял шийтгэгдэж байсан Б-г шүүхээс онц, аюултай гэмт хэрэгтнээр тооцож, 10 жил 6 сар 10 хоногийн хорих ял оногдуулан, ялыг онцгой дэглэмтэй хорих ангид эдлүүлэхээр шийдвэрлэжээ.