УИХ-ын чуулганы хуралдаан 10:00 цагт эхэллээ. Хуралдаанаар Сонгуулийн ерөнхий хороо /СЕХ/-ны гишүүнийг чөлөөлөх, томилох асуудлыг хэлэлцлээ.
Сонгуулийн ерөнхий хорооны гишүүн Д.Дэлгэрцогтыг чөлөөлж, түүний оронд Цагдаагийн ерөнхий газрын дарга Ө.Энхтөрийг томилох асуудлыг УИХ-ын Төрийн байгуулалтын байнгын хорооны хуралдаанаар хэлэлцсэн санал дүгнэлтийг чуулганд танилцууллав. Сонгуулийн ерөнхий хорооны гишүүн Д.Дэлгэрцогт нь гадаадад ажиллахаар томилогдсон учраас өөрийн хүсэлтээр ажлаасаа чөлөөлөгдөх санал гаргасан юм байна. Тиймээс СЕХ-ны гишүүнээс Д.Дэлгэрцогтыг чөлөөлж, түүний оронд Цагдаагийн ерөнхий газрын дарга Ө.Энхтөрийг томилох санал гаргажээ.
Хэлэлцэж байгаа асуудалтай холбогдуулан гишүүд санал хэлээгүй учраас Төрийн байгуулалтын байнгын хорооны саналаар буюу СЕХ-ны гишүүн Д.Дэлгэрцогтыг чөлөөлж, СЕХ-ны гишүүнээр Ө.Энхтөрийг томилохыг гишүүдийн олонхи дэмжиж, баталлаа. Ингээд СЕХ-ны гишүүнээр Цагдаагийн ерөнхий газрын дарга Ө.Энхтөр ажиллахаар болов.
Чуулганы хуралдаанаар яг одоо Монгол Улсын Ерөнхий аудиторыг чөлөөлөх, томилох асуудлыг хэлэлцэж байна.