УИХ-ын гишүүн асан М.Зоригт эх орноо тойрон аялаж ястан, угсаатан бүрийн онцлогийг харуулсан баримтат кино хийхээр шийджээ. Тэрбээр 21 аймаг, 331 сумаар аялах санаагаа Өмнөд Солонгост 600 км дугуйгаар аялахдаа олсон гэнэ. Тэрбээр, “Би амьдралын 50 гаруй жилд ингэж эрх чөлөөтэй өөрийн зоргоор амьдарч үзсэнгүй. Ясли, цэцэрлэгээс эхлээд бага, дунд, их сургууль, хожмоо ажил алба, УИХ, Засгийн газарт ажиллан байнга л бусдын зоргоор, бусдын төлөө ажиллаж байсан бол өнгөрсөн оны сонгуулиас хойш өөрийнхөө дур зоргоор, санаснаа хийж, сайхан байна” хэмээн өгүүлсэн удаатай.
Тиймээс дуран авайтай нөхөрлөсөн он жилүүдийнхээ үр шимийг гаргаж, баримтат кино хийхээр болсон байна. 331 сум бүрээс сум, орон нутгийхаа үүх түүхийг мэддэг таван хүний дурсамжийг сонсохын дээр ястан, үндэстнийхээ язгуур урлагийг харуулсан тоглолтыг ч багтаахаар төлөвлөсөн байна. Энэхүү ажил нь түүний ойрын төлөвлөгөөнд багтжээ. Гэхдээ киногоо нэг жилд багтааж бүтээнэ гэж амлаж чадахгүйгээ хэлжээ. Нэг суманд нэг хоноход л бүтэн жил шаардлагатай гэжээ.