Өмнөговь аймгийн Цогтцэций сумын төвөөс урагш 5 км-т “Хадана ус” гэдэг газарт “Шунхлай” ХХК-ийн шатахуун тээвэрлэж явсан машин унаж тээвэрлэж явсан дизель түлш асгарсан гэсэн мэдээлэл Онцгой байдлын газарт иржээ.
Ажлын хэсгийн бүрэлдэхүүнийг очиход “Шунхлай” ХХК-ийн 44 тонн дизель түлшийг Дорноговь аймгаас, Өмнөговь аймгийн Цогтцэций сумын чиглэлд тээвэрлэж явсан “35-51” УНН улсын дугаартай Норд-Бенз маркийн автомашины чиргүүл хажуугаараа унаж, тээвэрлэж явсан 44 тонн дизель түлш 2400 м2 талбайд алдагдаж хөрсөнд нэвчсэн байжээ. Шатахуун гүн хэсэгтээ 30 см, зах хэсгээрээ 5-10 см нэвчсэн байжээ.
Тиймээс ажлын хэсгийнхэн шороон замын ховилд тунаж үлдсэн 1150 литр дизель түлшийг битүүмжлэлтэй саванд зөөвөрлөн, хөрс хуулах ажиллагааг шуурхай эхлүүлэн бохирдсон гадаргууг тусгайлсан цэгт зөөвөрлөж хүн мал, амьтан, байгаль бохирдохоос урьдчилан сэргийлжээ.
