НӨАТ-ын тухай хуулийн дагуу иргэд худалдан авалт болон үйлчилгээ авсан баримтаа бүртгүүлснээр сар бүр сугалаанд оролцох боломжтой болсон. Мөн 20 хүртэл хувийн буцаан олголт авахаар болсон. Хуулийн дагуу иргэд 2017 оны эхний улиралд буюу гуравдугаар сарын 31-ний өдрөөс өмнө буцаан олголтоо авна.
Ингэхдээ 2016 оны баримтуудаа энэ оны нэгдүгээр сарын 6-ны дотор буюу өнөөдрийн 23:59 цагаас өмнө бүртгүүлэх шаардлагатай. Үүний дараа та өөрийн хувийн мэдээллийг сайтар нягтлан, дахин баталгаажуулахад таны дансанд буцаан олголтын мөнгө автоматаар орох юм. .
Оны өмнөхөн ebarimt.mn сайт дахь иргэдийн бүртгүүлсэн баримт устаж үгүй болсон тухай мэдээлэл цахим орчинд тархсан. Шинэ оноос эхэлж 2016, 2017 он гэсэн хоёр цонхтой болох юм байна. Тодруулбал, 2017 оны цонхонд 2017 оны нэгдүгээр сарын 1-нээс хойш хэвлэгдсэн баримтууд бүртгэгдэнэ гэсэн үг. Иргэд 2016 оны бүх баримтыг 2017 оны нэгдүгээр сарын 6-нд бүртгүүлж дуусах ёстой. Түүнээс хойш 2017 оны цонхонд бүртгэл хийж эхлэх аж.