Хөгжлийн банкийг тойрсон асуудал он дамжин яригдаж байна. Тус банкны санхүүг шалгах хоёр ч ажлын хэсэг ажиллаж буй. Засгийн газрын ажлын хэсэг дүгнэлтээ УИХ-д танилцуулж, хэлэлцүүлж буй. Харин УИХ-аас томилогдсон ажлын хэсгийг УИХ-ын гишүүн Ж.Энхбаяр ахалж буй. Тус ажлын хэсэг дүгнэлтээ олон нийтэд танилцуулахад бэлэн болжээ.
Энэ талаар ажлын хэсгийн ахлагч Ж.Энхбаяр:
Хөгжлийн банкнаас хэн зээл авсныг бүрэн тодруулж, дууслаа. Бид бүх хэвлэлийн мэдээллийн байгууллагад материалыг нээлттэйгээр өгнө. Ингэснээр Монгол Улс анх удаа олон улсын зах зээлд гаргасан бондоос татан төвлөрүүлсэн хөрөнгөө яаж ашигласан мэдээлэл ил тод болно. Олон нийтийн хяналт давхар хэрэгтэй байгаа учраас ил тод болгож байгаа юм.
Зургаан их наяд төгрөг зээл хэлбэрээр зарцуулагдсан байна. Дотроо гурван том бүлэг болж байна.
1.Улсын төсвөөс эргэн төлөгдөх хөтөлбөр буюу 6 их наядын 54 хувь
2.Арилжааны банкаар дамжуулан хэрэгжүүлсэн нэг их наяд төгрөгийн төслүүд
3.Хөгжлийн банкнаас өөрөө шууд зарцуулсан 16 том төсөл байна. Хувийн хэвшлийн 8, улсын үйлдвэрийн газрын 8 төсөл байна.
Зээлийг ямар иргэн, аж ахуйн нэгж авсан, төлөлтийн явц ямар байна гэдгийг судалж дууссан. Одоо олон нийтэд ил тод зарлана гэсэн мэдээллийг өглөө.