-Косово улсын олимпийн анхны аварга Майлинда Кельменди, Японы алдарт жүдоч Шохэй Оно нар оны шилдэг боллоо-
Олон улсын жүдо бөхийн холбооноос оны шилдэг эрэгтэй, эмэгтэй жүдочийг онлайн санал асуулгаар тодрууллаа. Энэ жилийн шилдэг жүдочдод “Рио 2016” олимпийн наадмын аварга болон медальтнууд нэр дэвшээд байсан юм. Ингээд эмэгтэй жүдочдыг Косовогийн тамирчин Майлинда Кельменди 5299 саналаар тэргүүлсэн бол эрчүүдээс Японы алдарт жүдоч Шохэй Оно 2166 саналаар шилдэг нь боллоо. Тэд Риогийн аваргууд юм.
Косовогийн жүдоч Майлинда Кельменди Риогийн татамид 52 кг-д түрүүлэхдээ нэгэн түүхэн амжилтын эзэн болсон. Балканы жижигхэн орон Косово улсын олимпийн анхны алтан медалийг авчирсан тэр энэ жил улсынхаа төдийгүй дэлхийн шилдэг жүдоч болох амжилтыг үзүүлсэн.
Тэгвэл эрчүүдээс Японы алдар жүдоч Шохэй Оно шилдэг нь байлаа. Дэлхийн хошой аварга Оно Риод жиндээ /73 кг/ түрүүлж, олимпийн анхны алтаа хүртсэн. Энэ жил 24 настай Риогийн аварга хэдхэн хоногийн өмнө Ц.Шийрэв багшид мэндчилгээ дэвшүүлсэн билээ.
Энэ жилийн дэлхийн шилдэг жүдочдын санал асуулгад эрэгтэй, эмэгтэй есөн тамирчин нэр дэвшсний дунд Казахстан улсын Гавьяат тамирчин Г.Отгонцэцэг амжилтаараа багтсан юм.