Хүчтэний өлгий Архангай аймгийн бөхийн дэвжээ үүсэн байгуулагдсаны 20 жилийн ой,Архангай аймгаас төрж гарсан улсын цолтой бөхчүүдэд хүндэтгэл үзүүлэх барилдаан өчигдөр Монгол бөхийн өргөөнд боллоо. Барилдаанд улсын аварга Ч.Санжаадамба, арслан Р.Пүрэвдагва, гарьд Ш.Жаргалсайхан, заан Б.Батмөнх, харцага Ц.Содномдорж тэргүүтэй хүчит 224 бөх зодоглосноос арслан Р.Пүрэвдагва түрүүлж, аварга Ч.Санжаадамба үзүүрлэв. Р.Пүрэвдагва аваргаас наадмын даагаа нэхсэн бол Ч.Санжаадамба аварга цол хүртсэнээсээ хойш анх удаа унаж буй нь энэ юм. Харин их шөвөгт олимпийн аварга, Хөдөлмөрийн баатар, гавьяат тамирчин, улсын харцага Н.Түвшинбаяр, начин Б.Амарзаяа нар шалгарлаа.