Монгол Улсын гавьяат тамирчин, уулчин Б.Гангаамаа дэлхийн долоон тивийн ноён оргилуудын зургаад нь гарч, эх орныхоо төрийн далбааг мандуулаад байгаа билээ. Энэ удаад тэрбээр хамгийн сүүлчийн оргил болох Антарктид тивийн Винсон Массиф /4897 м/ ууланд авиралт хийхээр эх орноосоо мордлоо. Ингэснээр дэлхийн долоон тивийн ноён оргилд амжилттай авирсан анхны монгол уулчин болох юм.
Антарктид тивд одоо зуны улирал болж буй ч тивийн ноён оргил Винсон Массиф ууланд-35 хэмийн хүйтэн байгаа аж. Манай уулчин ОХУ-ын “7 Summits” клубыг сонгож цаг уурын хамгийн таатай үед авиралт хийхээр бэлтгэлээ базаасан байна.