Бага насны охидыг хойд эцэг нь байтугай төрсөн эцэг нь ч хүчирхийлсэн хэрэг сүүлийн үед олширчээ. Насных нь хувьд авч үзвэл 17-49 насны үйлдэгчид байдаг байна. Бусармаг сэтгэлтэй, бузар үйлдэлтэй хүмүүсийн хохирогч нь өсвөр үеийнхэн болоод байна. Хохирогч охидын дунд хийсэн судалгаагаар 56.7 хувь нь ураг төрлийн хүчин, 29.7 хувь нь болзооны хүчин, 13.6 хувь нь гудамж талбайн хүчингийн хохирогч болсон байна.
Хүчирхийлэлд өртөж, сэтгэл гутралд орсон охид өөрийн биеийг үзэн ядах сэтгэлгээтэй болж цочирлоосоо болж зан үйлийн өөрчлөлт орж, сурлага нь муудах, бусдыг дээрэлхэх, дээрэлхүүлэх, хэнтэй ч нийлэхгүй болж гэрийнхэнтэйгээ сөргөлдөх үйлдэл гаргадаг байна. Гэвч ихэнх эцэг эхчүүд хүүхдээ шилжилтийнхээ үедээ явж байна гэж боддог байна.
Энэ гэмт хэрэг яагаад далд байдаг вэ гэхээр ихэнх нь ураг төрлийн дотны хүн нь байдаг. Эсвэл төрөл бүрийн аргаар заналхийлдэг учир хүүхэд айдаг байна. Хүчирхийлэлд өртсөн хүүхэд өөрийгөө илчлэх нь бага байдаг. Тиймээс ойр дотны хүмүүс нь л үүнийг мэдэх боломжтой.
Хохирогчид шууд сэтгэлзүйн хувьд өөрөө илчилж чадахгүй байдалд орох нь бий. Мөн эдийн засгийн асуудлаас шалтгаалаад илчлэхгүй байх тохиолдол ч байдаг байна. Сэтгэлзүйн түвшинд нойргүйдэх, ямар өвчнөөр өвдсөн нь тодорхойгүй хүмүүс байдаг. Эдгээр хүмүүсийн ихэнх нь бага насандаа хүчирхийлэлд өртсөн байдаг гэсэн судалгаа гарчээ.
Англи, Австрийн судлаачдын үзэж байгаагаар хүчирхийлэгчид нь бага насандаа өөрсдөө хүчирхийллийн хохирогч болсон эсвэл харсан гэрчүүд байдаг байна. Мөн хүний наймааны золиос болсон хүмүүс ийм үйлдэл хийх нь элбэг байдаг байна.
О.ӨНӨР