Энэ жилийн наадамд үзүүрлэж Монгол Улсын арслан цол, Даншиг наадмаар түрүүлж, аварга цол хүртсэн Рэнцэнбямбын Пүрэвдагва өнгөрсөн амралтын өдрүүдэд ӨМӨЗО-д болсон “Алтан бүс” барилдаанд түрүүлжээ.
Энэхүү барилдаанд манай улсаас арслан П.Бүрэнтөгс, Р.Пүрэвдагва, улсын заан Б.Пүрэвсайхан, улсын харцага Ө.Бат-Орших, Т.Баасанхүү нарын тэргүүтэй бөхчүүд барилдаж , залуу арслан Р.Пүрэвдагва өвөрлөгч нутгийн аварга н.Батжаргалтай үзүүр, түрүүнд үлдэж, өвдөг шороодуулан, бас нэгэн түрүүгээ авлаа.
Р. Пүрэвдагва арслангийн хувьд өнгөрсөн долоо хоногт болсон Монгол бахархлын өдөрт зориулсан чансаа өндөр 128 бөхийн барилдаанд Дундговь аймгийн Эрдэнэдалай сумын харьяат улсын начин Э.Дашыг уран гоё өмсөх мэхээр долоо давж, түрүүлсэн. Өнгөрсөн есдүгээр сараас МҮБХ-ноос зохион байгуулдаг заал, танхимын барилдаан аварга Ч.Санжаадамба, арслан Р.Пүрэвдагва нар барилдаанд гараагүй байв. 2016 оны цагаан сар, наадам, аравдугаар сарын 23-нд тохиосон Начин цолны хүндэтгэлийн барилдааныг оролцуулсан нийт 14 барилдааны чансааг отгон арслан Р.Пүрэвдагва 13207 оноогоор тэргүүлж, улсын аварга Г.Эрхэмбаяр 12518, улсын харцага Т.Баасанхүү 12175, харцага Ц.Содномдорж 11600, Б.Гончигдамба 11490 оноогоор эхний тавд бичигджээ. Үүгээрээ тэр мөн үндэсний бөхчүүдээ барилдааны агуулга, чанарын хувьд ахалж байгаагаа харуулав.
Үндсэндээ Р.Пүрэвдагва арслан улсын баяр наадамд үзүүрлэж, арслан цол хүртсэнээсээ хойш цөөхөн барилдаанд зодоглож байгаа ч тэр цөөндөө бүгдэд нь түрүүлжээ. Залуу хүчтэнийг Сар шинийн барилдаан, ирэх жилийн наадам гээд чансаа өндөр барилдаанууд хүлээж байгаа ч өдгөө улсын том цолны босгоор алхсан чадамжааа дааж барилдаж байгаа нь үнэлүүштэй.
РЭНЦЭНБЯМБЫН ПҮРЭВДАГВА
Архангай аймгийн Булган сумын харьяат Батлан хамгаалах яамны “Алдар” спорт хороо, Зэвсэгт хүчний 150-р анги, “Алтан дорнод Монгол” ХХК, “Бөхбилэгт” дэвжээний бөх. 1985 онд төрсөн.
Амжилт:
• 2008 онд Архангай аймгийн наадамд түрүүлж, Аймгийн арслан цол хүртсэн.
• 2009 онд Архангай аймгийн наадамд үзүүрлэсэн.
• 2010 онд Хэнтий аймгийн наадамд түрүүлж, хурц чимэг хүртсэн.
• 2012 онд Улсын баяр наадамд тав давж, Улсын начин цол хүртсэн.
• 2014 онд Улсын баяр наадамд тав давж, Өсөх идэр чимэг хүртсэн.
• 2016 онд Улсын баяр наадамд ес давж үзүүрлэн, Улсын арслан цол хүртсэн.
2016 онд “Даншиг наадам-Хүрээ цам” наадамд түрүүлж Даншигийн аварга цол хүртсэн.
Э.МӨНХТҮВШИН