Өмнөд Солонгосын Ерөнхийлөгч Пак Ын Хэ шинэ Ерөнхий сайдаар 62 настай Ким Бён Жун, Сангийн сайдаар Иим Жон Юн нарыг томилсон талаар “www.bloomberg.com” мэдээллээ. Шинээр томилогдоод буй Ерөнхий сайд улс оронд нь үүсээд буй үймээнийг намдааж, буруутанг хуулийн дагуу шийтгэхээ амлажээ.
Ерөнхийлөгчийг огцрохыг олон нийт шаардсаар байна. Тэрбээр Ерөнхийлөгчийн сонгуульд өрсөлдөж байхдаа хэлэх үгээ найзаараа хянуулдаг байсан, “Севол” хөлгийн асуудлаар албаны хүмүүстэй бус найзтайгаа зөвлөсөн нь олны дургүйцлийг хүргэж байна.
Ерөнхийлөгчийн найз Чой Сун Сил өчигдөр Сөүлийн Прокурорын газарт байцаалт өгөх үеэрээ олон нийтээс уучлалт гуйсан билээ.
Олон нийт Чой Сун Сил төрийн нууцад хамааралтай материалыг үзэж, улсын хэрэгт хөндлөнгөөс оролцож байна хэмээн буруутгаж, хуулийн дагуу шийтгэхийг шаарджээ. Ерөнхийлөгч өнөөг хүртэл найзынхаа асуудлаар мэдэгдэл хийгээгүй байгаа юм.