Төрийн соёрхолт урлагын гавьяат зүтгэлтэн, хөгжмийн зохиолч Б.Шаравын нэрэмжит мэргэжлийн дуучид, үндэсний хөгжимчдийн олон улсын II уралдаан энэ сарын 15-23-ны өдрүүдэд болох гэж байна.
Энэхүү олон улсын уралдааныг анх 2012 онд зохион байгуулж байсан юм. Уралдаанд 30 хүртэлх насны мэргэжлийн дуучин, 35 хүртэлх насны хөгжимчид оролцох боломжтой бөгөөд одоогоор ӨМӨЗО, ОХУ-ын Буриад, Казахстан болон Монголын нийт 60 гаруй уран бүтээлчид оролцохоор бүртгүүлсэн байгаа аж. Тус уралдаан нь мэргэжлийн дуулаачийн урлаг болон үндэсний хөгжмийн урлагыг дэмжин тэтгэх, дэлхийд эх орноо сурталчлах зорилгоор зохион байгуулж буй олон улсын уралдаан юм. Хөгжмийн зохиолч Б.Шарав гуай тус тэмцээний талаар хэлэхдээ “Бид энэхүү уралдааныг олон улсын жишигт нийцүүлэхийн тулд шагналын санд гол анхаарлаа хандуулсан. Олон улсын жишгийн доод хэмжээнд хүрсэн 10 мянган ам.долларын шагналын сантай уралдаан. Бид цаашдаа шагналын санг өсгөж, олон улсын жишигт хүргэх шаардлагатай гэж боддог” гэжээ.