УИХ-ын чуулганы хуралдаанаар хэлэлцэх асуудлын дагуу өнөөдөр УИХ-д суудалтай намын бүлгүүд хуралдана. МАН-ын бүлгийн хуралдаан 11.00 цагт эхлэх тов байгаа ч хараахан эхлээгүй байна.
Бүлгийн хуралдаанаар 2017 оны төсвийн төсөл, аж ахуй нэгжийн орлогын албан татварын тухай хуульд нэмэлт өөрчлөлт оруулах тухай, авлигатай тэмцэх, хариуцлага, шударга ёсыг бэхжүүлэх зэрэг асуудлыг хэлэлцэх аж.
Мөн үдээс хойш Аюулгүй байдал гадаад бодлогын байнгын хороо, Нийгмийн бодлого, боловсрол, соёл, шинжлэх ухааны байнгын хороо хуралдах юм байна.
Тэгвэл өнөөдөр АН-ын бүлэг хуралдахгүй. Харин тус намын бүлэг өнөөдөр 14:00 цагт Төрийн ордны “Иргэний танхим”-д нээлттэй хэлэлцүүлэг зохион байгуулахаар болжээ.
Уг хэлэлцүүлгээр Монгол Улсын 2017 оны төсвийн тухай, нийгмийн даатгалын сангийн 2017 оны төсвийн тухай болон холбогдох бусад хуулийн төслүүдийн үзэл баримтлал, Мөнгөний бодлого, Эдийн засгийн хүндрэлийг даван туулах, тогтворжуулах хөтөлбөр батлах тухай иргэдэд мэдээлэл өгч, санал бодлыг нь сонсох юм байна.