Өчигдөр буюу наймдугаар сарын 29-ний өдөр Улаанбаатар хотын Замын цагдаагийн газрын ЖШУХ дээр нийт 430 дуудлага, мэдээ мэдээлэл хүлээн авснаас, зам тээврийн ослын 338 дуудлага бүртгэгдсэн байна. Үүнээс гэмт хэргийн шинжтэй мэдээлэл ес бүртгэгдэж, 14 хүн хүнд, хөнгөн гэмтжээ.
Тухайлбал, Чингэлтэй дүүрэг зуслангийн зам Салхитын буудалд Verna маркийн автомашины жолооч нь Landcruiser маркийн П жолоочтой автомашинтай мөргөлдөж, ослын улмаас гурван хүн гэмтжээ. Улмаар аваар гаргасан жолооч ослын газрыг орхин явсан үйлдэлд эрүүгийн хэрэг үүсгэн шалгаж байна. Мөн хөдөө орон нутагт, Өмнөговь аймгийн Ханбогд сумын Ухаа худаг уурхайгаас Цагаан хад чиглэлийн асфальтан замд UAZ маркийн ачааны автомашин, явган зорчигч 45 настай Б-г мөргөж амь насыг нь хохироосон хэрэг гарч, тус аймгийн цагдаагийн газраас шалгаж эхэлжээ. Сүүлийн үед гэмт хэргийн шинжтэй осол аваарын дараа, жолооч ослын газрыг орхин явах тохиолдол олноор бүртгэгдэх болсон. Иймд жолооч та ослын газрыг орхин явах нь өөрийгөө давхар хохироож байгаагаа ухамсарлаж иргэний үүргээ биелүүлэхийг Замын цагдаагийн газраас санууллаа.