Өнөөдөр Шүүхийн ерөнхий зөвлөл, Шүүгчдийн холбоо, Хуульчдын холбооны дэргэдэх Шүүгчдийн хороо хамтран “Шүүхийн төсөв, шүүгчийн цалингийн асуудлаар” хэвлэлийн бага хурал хийлээ. Уг хуралд, Шүүхийн ерөнхий зөвлөлийн Гүйцэтгэх нарийн бичгийн дарга Т.Мэндсайхан, Хуульчдын холбооны Шүүгчдийн хорооны тэргүүн Ц.Оч, Шүүгчдийн хорооны Удирдах зөвлөлийн гишүүн Ц.Өрнөндэлгэр, МУИС-ийн хууль зүйн сургуулийн багш, доктор О.Мөнхсайхан нар оролцож шүүгчийн цалинг бууруулахгүй байх хэд хэдэн үндэслэлийг танилцуулав. Ялангуяа шүүгчдийн цалингийн зээлийг онцолж байв.
Шүүгчдийн 98.5 хувь нь арилжааны банкуудад 24.5 тэрбум төгрөгийн зээлтэй бөгөөд нэг шүүгч дунджаар 583000-3 250000 төгрөгийн зээл нэг сарын төлбөрт төлдөг байна. УИХ-аас шүүхийн 2016 оны төсвийг Шүүхийн ерөнхий зөвлөлийн даргын багц 48.9 тэрбум, Улсын дээд шүүхийн Ерөнхий шүүгчийн багцыг 3.4 тэрбум төгрөгөөр баталсан юм. Ингэснээр шүүхийн цалингийн сан төсвийн 41 хувийг эзэлж байгаа аж.
Шүүгчийн цалинг бууруулснаар шударга ёсыг үнэгүйдүүлж, шүүх эрх мэдлийн хараат бус байдлыг алдагдуулан, цалингийн зээлтэй шүүгчдийг банк, мөнгөний барьцаанд оруулах аюултай хэмээн Шүүхийн Ерөнхий Зөвлөлөөс үзэж байгаагаа илэрхийллээ.