БНХАУ-ын Бээжин хотоос Эрээн орох замд орших Ша Хуа Юань суурины ойролцоо монголчуудыг тээвэрлэж явсан автобус шатсан хэрэг энэ сарын 04-ний шөнө гарсан билээ. Ослын улмаас зорчигчдын амь нас, эрүүл мэндэд хохироогүй ч тэдний ачаа тээш, бараа таваар болон бичиг баримт нь шатсан юм.
Тэгвэл иргэдийн хохирлыг барагдуулах ажлын явцын талаар Гадаад харилцааны яамны Консулын газраас дахин мэдээлэл өглөө.
Тодруулбал, “Бээжин-Эрээн чиглэлийн зорчигч тээврийн автобус шатсаны улмаас хохирсон монгол иргэдийн хохирлыг барагдуулах чиглэлээр Гадаад харилцааны яам Монгол Улсаас БНХАУ-д суугаа ЭСЯ-аар дамжуулан тээвэр гүйцэтгэж байсан “Есөн луу” компани болон даатгалын компанитай байнгын холбоотой ажиллаж байна. Уг асуудлыг анхааралдаа авч, дэмжлэг үзүүлэх талаар БНХАУ-ын ГХЯ-нд мөн хандаад байгаа болно.
Одоогийн байдлаар даатгалын компаниас гаргасан хүсэлтийн дагуу хохирсон иргэдээс шаардлагатай материалыг нь бүрдүүлж, баталгаажуулахаар ажиллаж байна.Өнөөдрийн байдлаар нийт 17 иргэний материал бэлэн болоод байна” хэмээв.