Өнгөрөгч амралтын өдөр нийслэлийн засаг дарга С.Батболд, Улаанбаатар хотод шинээр баригдаж байгаа болон өргөтгөл хийж буй сургууль, цэцэрлэгүүдээр өөрийн биеэр явж танилцжээ. Энэ үеэрээ тэрээр, цэцэрлэгийн бүртгэлийн явцад хүүхдээ амар хялбар аргаар цэцэрлэгт өгөх гэсэн эцэг эхчүүд эрхлэгч багш нарт авлига өгч, авдаг гэх гомдол их гардаг. Тиймээс Авлигатай тэмцэх газартай хамтран цэцэрлэг сургуулийн бүртгэлд хяналт тавьж ажиллана” хэмээсэн юм. Засаг даргын уг мэдээллийн дараа цахим орчинд, Авлигатай тэмцэх газар хийх ажилгүй болж, цэцэрлэгийн багш нарыг шалгах дээрээ тулжээ гэх сэтгэгдлүүд олноор харагдах болов.
Тиймээс, Авлигатай тэмцэх газраас цэцэрлэгийн бүртгэлийг хянан шалгаж байгаа эсэх талаар АТГ-ын олон нийттэй харилцах албанаас тодруулбал “Авлигатай тэмцэх газраас цэцэрлэг сургуулийн бүртгэлийг хянаж шалгана гэсэн албан ёсны мэдэгдэл гаргаагүй. Өмнө жилүүдэд боловсрол болон эрүүл мэндийн салбарт авлигаас урьдчилан сэргийлэх ажлыг зохион байгуулж ирсэн. Энэ жил мөн энэ жишгээр ажиллаж байгаа. Тэрнээс цэцэрлэгийн багш ажилчдыг хянаж шалгана гэдэг ташаа мэдээлэл. Авлигатай тэмцэх газраас боловсролын салбарт авлигаас урьдчилсан сэргийлэх арга хэмжээг хэзээд авч ирсэн” гэлээ.
Авлигатай тэмцэх газрын өмнөөс ярьсан засаг даргын сүржин үгс тус газрыг олон нийтийн шүүмжлэлд өртүүлээд зогссонгүй цэцэрлэг сургуулийн бүртгэлийг зохион байгуулах, хяналт тавин ажилладаг гэх Нийслэлийн боловсролын газрыг чадамжгүй байгууллага хэмээн нийтэд зарласантай ижил хэрэг боллоо хэмээн иргэд шүүмжилж байна.