Филиппинийн Ерөнхийлөгч Родриго Дютерт өчигдөр Манила хотноо зохион байгуулагдсан Цагдаагийн байгууллага үүсэн байгуулагдсаны 115 жилийн ойн баярын үеэр НҮБ-ыг тэнэг хэмээн шүүмжилсэн талаар “www.channelnewsasia.com” мэдээллээ. Тус улс өнгөрсөн сарын 22-ноос эхлэн хар тамхи хэрэглэдэг хүмүүсийг хүчээр баривчлах, эсэргүүцэл үзүүлсэн хүмүүсийг буудан хороож эхэлсэн билээ.
Ерөнхийлөгчийн хар тамхичидтай тэмцэх тэмцлийн үеэр хамгийн багадаа 1000 хүн амиа алдсан болохыг НҮБ-ын Хүний эрхийн байгууллагаас мэдээлж “Филиппинийн Ерөнхийлөгч олон улсын хууль дүрмийг зөрчиж, хүний эрх чөлөөг ноцтой зөрчиж байна” гэж мэдэгдсэн юм.
Харин уг мэдэгдлийн хариуд Ерөнхийлөгч “НҮБ ямар эрхтэй гэж тусгаар улсын асуудалд хөндлөнгөөс оролцож, зааж зөвлөж байгаа юм. Би ард түмэндээ амласан ёсоороо хууль бусаар хар тамхи борлуулж, хэрэглэсэн бүхэнтэй тэмцэх болно. Тэд харамсах хүртэл энэ тэмцэл үргэлжлэх болно. НҮБ бидний асуудал бус илүү чухал асуудалд анхаарлаа хандуул” гэсэн байна.
НҮБ-ын ерөнхий нарийн бичгийн дарга Бан Ги Мүн Филиппинийн Ерөнхийлөгчтэй хоёр талын харилцааны асуудлаар утсаар холбогдохыг хүссэн ч татгалзсан хариу авчээ.