Лондонгийн олимпийн аварга, Токиогийн дэлхийн аварга, Парисийн ДАШТ-ий хүрэл медальт, Азийн наадмын аварга, Ази тивийн аварга, Их дуулгын гурван удаагийн аварга, “Чингис хаан” гранпригийн хүрэл медальт Каори Мацүмототой 2015 оны “Чингис хаан” гран при тэмцээний үеэр манай сэтгүүлч Д.Даваасүрэн ярилцаж байсан юм. “Өдрийн сонин”-ы архивыг нээн ярилцлагыг хүргэж байна.
Өчигдөр болсон “Рио-2016” олимпийн наадмын шигшээ барилдаанд манай тамирчин Д.Сумъяа Каори Мацүмотог ялж, мөнгөн медалийн болзол хангасан билээ.
-Хүрэл медалийн төлөө Австрийн жүдочтой таарч сайхан барилдаан харууллаа. Өрсөлдөгчийнхөө мэхний хийг хүлээж байв уу?
-Тийм ээ. Би Австрийн жүдоч Сабринатай өмнө хэд хэдэн удаа таарч барилдаж байсан. Барилдааныг нь сайн мэднэ. Эхлээд шууд мэхээ хийх гэсэн боловч чадаагүй. Тэгтэл өрсөлдөгч маань өөрөө вазари алдчихсан.
-Хүрэл медаль хүртсэндээ сэтгэл дундуур байгаа юм уу. Медалиа зохион байгуулагч залууд өгсөн гэсэн?
-Үгүй ээ. Тайван байна. Сэтгэлээр унаагүй. Гол нь удахгүй болох ДАШТ-д л амжилт гаргах нь чухал. Ер нь би татамид гарахдаа хэзээ ч заавал алтан медаль авна гэж шунадаггүй. Зөвхөн урдаа зогсч буй өрсөлдөгчтэйгөө тайван барилдах нь чухал гэж боддог. Байнга би ялах ёстой гэж бодоод байхаар өөрийгөө хэт их барьчихдаг муу талтай.
-Таны жинд түрүүлсэн Монголын бөх Д.Сумъяатай та хагас шигшээд таарч ялагдсан. Энэ барилдааныхаа тухайд…
-Хамгийн сургамж болсон барилдаан байлаа. Монголын бөх бусад орны бөхчүүдийг бодвол их бяртай байсан. Би хичнээн зүтгээд ч дийлэхгүй цэвэр ялагдсан.
-Д.Сумъяатай учраа таарна гэж тооцоолж байсан уу?
-Тооцоолсон байсан. Гэвч түрүүлж барилдаан гаргаж чадсангүй. Өмнө нь хоёр удаа таарч байсан. Энэ удаа харин ялагдлаа. Тиймээс цаашид илүү их хичээж, хүчний тал дээр бэлтгэлээ түлхүү хийе гэж бодлоо. Дахиж ийм алдаа гаргахгүй ээ.
-Таны хувьд 2012 онд Лондонгийн олимпийн аварга болсон. Олимпийн аваргын мөрөөдөл юу бол?
-Ирэх сард болох Дэлхийн аварга шалгаруулах тэмцээнд амжилттай оролцох. Өөрийнхөө жинд дэлхийд номер нэг тамирчин болох хүсэлтэй.
-Таны жинд хамгийн хүчтэй өрсөлдөгч хэн байна?
-Португалийн жүдоч байх аа. Монтиро. Бас Монголын жүдоч.
-Таны барилдааны арга барилыг сонирхож болох уу. Дэвжээн дээр их тайван харагддаг?
-Би дэвжээн дээр гарахдаа аль болох тайвширч, тогтож барилдахыг хичээдэг.
-Тэгэхээр барилдах үедээ дасгалжуулагчийнхаа хажуугаас өгч буй зөвлөгөөг сайн сонсдог байх нь ээ?
-Тийм.Сайн сонсдог. Тайван барилдахад орчноо сайн мэдэрч чаддаг. Дасгалжуулагчийн үг маш сайн сонсогддог. Барилдах үед миний алдаа оноог дасгалжуулагч сайн харж байдаг учраас түүний үгийг маш сайн сонсч барилддаг.
-Жүдогоор хичнээн жил хичээллэж байна вэ?
-22 жил.
-Одоо хэдэн настай юм бэ?
-27 настай. Би 1987 оны есдүгээр сарын 11-нд Японы Ишикава аймгийн Каназава хотод төрсөн. Таван настайдаа анх жүдо бөх сонирхож хичээллэсэн.
-Өдөрт хичнээн цаг бэлтгэл хийдэг вэ?
-Өглөө нэг цаг, өдөр хоёр цаг, орой гурван цаг бэлтгэл хийдэг.
-Түлхүү ямар бэлтгэл хийдэг бол?
-Өглөө гүйдэг. Өдөр хүчний дасгал хийнэ. Харин орой жүдогоор барилдана. Одоо хүчний бэлтгэлээ илүү хийе гэж бодож байна. (Инээв)
-Монголд ирээд төрсөн сэтгэгдлээсээ хуваалцахгүй юу?
-Уужим сайхан орон байна. Анх ирэхэд цагаан хөвсгөр зүйл хийсээд нэг тийм санагдсан. Тэгсэн тэр зүйл модноос гардаг гэсэн.
-Ямар санагдав?
-Гоё. Би өөрөө хөвсгөр зөөлөн зүйлд дуртай.
-Үзэгчид тантай хамт зураг даруулах гэж нэлээд бүчсэн. Та их сандарч байсан ч таатай хүлээж авсан шүү?
-Мэдээж гоё байсан. Манайд бол хүмүүс намайг таньж байгаа ч зураг авахуулж болох болов уу яах бол гээд эмээгээд хэлж чадахгүй өнгөрдөг. Харин монголчууд шууд хүрч ирээд хамт зураг авахуулъя гээд цуг зогсчихсон. Нээлттэй, шулуухан хүмүүс санагдлаа.