Монгол Улсын гавьяат тамирчин Доржсүрэнгийн Сумъяа “Рио-2016” олимпийн наадмаас мөнгөн медаль хүртэж монгол түмнээ баярлууллаа. Энэ торгон мөчид “Өдрийн сонин”-ы архивыг нээж, түүнтэй хийж байсан нэгэн сонирхолтой ярилцлагыг хүргэж байна.
“World masters” тэмцээний хошой алт, “Чингис хаан” дэлхийн цомын аварга, Чиндаогийн гран пригийн аварга Доржсүрэнгийн Сумъяагийн жүдогийн татамид гаргасан амжилтыг нэрлээд барамгүй. Тэрээр хамгийн сүүлд Дэлхийн оюутны спортын наадам болох Универсиадаас жүдо бөхийн 57 кг-ын жинд алтан медаль хүртсэн сайхан амжилт үзүүлсэн билээ. Энэхүү амжилтыг нь төр засаг үнэлж 30 сая төгрөгөөр шагналаа. Мөн тус наадмын буудлагын төрөлд алт, мөнгө, хүрэл медаль хүртсэн Э.Даваахүүд 36 сая, жүдо бөхийн төрөлд хүрэл медаль хүртсэн М.Уранцэцэгт 10 сая, буудлагын төрөлд мөнгө, хүрэл медаль хүртсэн О.Төгөлдөр, Э.Бадамгарав нарт тус бүр зургаан сая төгрөгийн мөнгөн шагнал олгосон байна. Энэ үеэр Олон улсын хэмжээний мастер Д.Сумъяатай уулзаж сэтгэгдлийг нь хуваалцлаа.
-Баяр хүргэе. Жүдогийн дэвжээнд гаргасан амжилтыг тань төр засаг үнэллээ. Сэтгэл хэр хөдөлж байна?
-Маш их баяртай байна. Монголын Жүдо бөхийн холбоо, Монголын оюутны спортын холбоо, гэр бүл, намайг үргэлж дэмждэг бүх хүмүүст баярласнаа хэлмээр байна.
Түүнчлэн Балжинням, Баттулга, Эрдэнэт-Од, Цэвэлмаа, Дашдаваа багш нартаа хамгийн их талархаж явдгаа хэлье. Х.Эрдэнэт-Од багш маань бидэнтэй байнга хамт байж бидний бэлтгэл сургуулилтыг ч сайн хийлгэдэг. Багш өөрийнхөө бүхий л эрдмийг надад өгсөн. Энэ бүхэн багш нарын минь л ач. Тиймээс цаашдаа илүү их амжилт гаргаж багшийгаа баярлуулж, Монголынхоо нэрийг дэлхийн дэвжээнд мөнхлөхийг хүсч байна.
-Энэ сард хоёр том тэмцээнд амжилт гаргалаа. “Чингис хаан” гранпригаас шууд Универсиадын татамид гарахад хэцүү байв уу?
-“Чингис хаан” гранприд оролцож алтан медаль авсан. Маргааш нь шууд БНСУ-ыг зорьсон. Долдугаар сарын 6-нд барилдах хуваарьтай байсан болохоор ганц өдөр амрах ч боломж гараагүй. Дэлхийн оюутны универсиад наадамд анх удаа оролцож барилдаад аварга болсондоо сэтгэл өндөр байна.
-Нэлээд хүчтэй өрсөлдөгчдийг өвдөг шороодуулж аварга болсон шүү?
-Мэдээж өрсөлдөгч болгон хүчтэй. БНСУ, Франц, Хорват, Япон гээд бүх л өрсөлдөгчид маш сайн байсан.
Муу өрсөлдөгч гэж хэзээ ч байхгүй. Би эхний тойрогтоо Солонгосын бөхтэй барилдсан. Тэр тамирчинтай өмнө нь барилдаж байсан удаатай. Ялж, ялагдаж өгөө аваатай барилдаж байсан. Энэ удаа ерөнхийдөө даагаа нэхэх барилдаан хийж би давсан.
-Удахгүй ДАШТ болно. Бэлтгэлээ хэр хангаж байна?
-Маргааш шигшээ багтайгаа бэлтгэлдээ гарна.
-Бэлтгэлээ хаана хийх вэ?
-Уламжлал ёсоор шигшээ багийнхантайгаа хөдөө гарч сар бэлтгэл хийнэ. Ирэх сард Казахстаны Астана хотод болох ДАШТ-ээс олимпийн эрх олгох оноо цуглуулах хамгийн чухал. Одоо яг л нэг сарын хугацаа үлдсэн байна. Тиймээс бэлтгэлдээ хамаг анхаарлаа төвлөрүүлчихээд байна.
-Одоогоор хэчнээн оноо цуглуулсан бэ?
-Эрэмбээрээ дэлхийд гуравт бичигдэж байгаа.
-Таны хувьд өмнө нь Лондонгийн олимпод оролцож байсан туршлагатай бөх. Тиймээс Рио Де Жанейрогийн олимпод ингэнэ, тэгнэ гэж бодсон санасан зүйл байгаа болов уу?
-Мэдээж миний хамгийн том хүсэл бол олимпийн аварга болох. Хүссэн бүхэн олимпод оролцдоггүй. Хамгийн их хүч хөдөлмөр зарцуулж хөлс гаргасан тамирчин л тэр наадамд очдог юм байна гэдгийг нүдээрээ үзсэн.
Өмнө нь оролцож байсан учраас тодорхой хэмжээний туршлагаас гадна бодсон юм байгаа. Тиймээс өөрийн чадах бүхнээ ирэх оны олимпод үзүүлнэ дээ.
-Өөрийн тань жинд Японы олимпийн аварга Мацүмото Каоригоос эхлээд олон хүчтэй бөх бий. Гэхдээ Мацүмото Каориг сая эх орныхоо дэвжээнд буулгаж авсан. Тэгэхээр олимпийн аварга болох шаанс ер нь бий гэж бодож байна…
-Баярлалаа. Лондоны олимпийн аварга Мацүмото Каори мундаг бөх. Каоригийн барилдааныг одоо бол сайн мэднэ. Хэд хэдэн удаа барилдаад үзчихлээ. Давж ч үзлээ. Тамирчин хүн өөрийгөө хэзээ ч голж болохгүй. Өрсөлдөгчөө надаас илүү гэж бодохгүй харин ч зоригтой байх ёстой. Жүдо бол цаг хугацааны тэмцэл. Эрсдэл маш ойрхон байдаг.