“Монгол гэдэг нэгэн нэр” булангийнхаа энэ удаагийн дугаарт Азийн томоохон тэмцээнүүдэд амжилттай оролцсон монгол залуусыг онцолж байна. Мөн Монголынхоо зан заншил, ахуй соёлыг уран бүтээлдээ шингээж Японд болон олон улсын тавцанд гаргаад буй авьяаслаг зураач Самбуугийн Заяасайханыг танилцуулъя.
Самбуугийн Заяасайхан нь Баянхонгор аймгийн Баацагаан сумаас гаралтай. СУИС-ийн монгол зургийн ангийг дүүргэсэн бөгөөд аав нь уран зохиол, зургийн багш хүн байсан учраас зурах сонирхолтой болжээ. Зураач Заяасайхан нь 2001 онд Германд, 2007, 2010 онуудад Америкт, 2008 онд Австралид, 2010 онд Англи болон Европын орнуудад, Нью Йоркт 2011 онд, Францад 2013 онд мөн Японд 10 шахам удаа үзэсгэлэнгээ гаргасан. 2015 оны арванхоёрдугаар сард Японд Мэргэжлийн сумогийн 70 дахь Их аварга Харумафүжи Бямбадоржтой “TWO WORLD art show” гэсэн хамтарсан уран зургийн үзэсгэлэнгээ гаргаж байсан юм. Түүний бүтээлд Монголын түүх, соёл урлаг, үндэсний хэв шинж, хатдын зураг голчилдог. Тэрбээр Японд ажиллаж амьдарч, уран бүтээлээ туурвидаг бөгөөд дэлхийд Монголынхоо нэрийг гаргаж яваа шинэ залуу үеийн уран бүтээлчдийн нэг. Зураач С.Заяасайхан Монголдоо 1999, 2003 онд үзэсгэлэнгээ гаргаж байсан юм. Харин 13 жилийн дараа буюу 2016 оны долдугаар сарын дөрвөнд “Зөгнөл Мөрөөдлийн Ертөнцдөө эгэхүй” үзэсгэлэнгээ гаргасан.
Балетынцом 35 жилийн дараа Монголд
БНСУ-д болсон “Korea international ballet competition” олон улсын балетын “А” зэрэглэлийн уралдаанд манай балетчид амжилттай оролцоод иржээ. Дэлхий 20 гаруй орны 150 бүжигчний авьяасыг сорьсон энэ уралдаанд УДБЭТ-ын найман бүжигчин амжилттай оролцсон юм. Ес дэх удаагаа зохион байгуулагдаж буй уг наадмаас Дуурийн театрын тайзнаа Нойрсож буй гоо бүсгүй, Хар, Цагаан хунгийн дүрийг үзэгчдийн сэтгэлд хоногштол бүтээсэн гоцлол бүжигчин О.Анужин хүрэл цом хүртэж, Монголын сонгодог урлагийн хөгжлийг дэлхийн тавцанд гайхуулсан билээ. Улмаар Шанхайн Олон улсын наадамд оролцох эрх авсан юм. Мөн энэхүү наадамд УДБЭТ-ын гоцлол бүжигчин О.Ганцоож гурван тусгай шагнал хүртсэн. Балетын бүжигчдийн зэрэглэлийг тодорхойлдог энэхүү хүрэл цомыг 1981 онд Ардын жүжигчин, Монголын балетын урлагийн хатан хаан гэгддэг Ю.Оюун Москва хотноо болсон олон улсын наадамд амжилттай оролцон эх орондоо анх удаа авчирсан түүхтэй. О.Анужин 21 настай бөгөөд балетын эмэгтэй бүжигчдийн амжилтын буухиаг 35 жилийн дараагаар үргэлжлүүлж буйгаараа онцлог. УДБЭТ-ын бүжигчин О.Анужин нь Хөгжим, бүжгийн коллежийн багш Т.Туулын шавь. Тэрбээр шавиараа бахархаж, “Монголын балетын урлагийг дэлхийн түвшинд хүргэхэд шавийн маань үзүүлсэн энэ амжилт их хувь нэмэр орууллаа” хэмээн сэтгэгдлээ хуваалцсан юм.
“Asian New Star Model Contest” тэмцээнд амжилттай оролцлоо
БНСУ-ын Сувон хотод зохион байгуулагдсан “Asian New Star Model Contest”-д нийт 23 орны 98 загвар өмсөгч оролцжээ. Азийн загварын холбооноос зохион байгуулдаг энэхүү тэмцээн нь Азийн орон бүрт шалгаруулалт явуулдаг. Харин шалгарсан моделиудад “Asian New Star Model Contest” тэмцээнд орох эрх өгдөг юм. Энэхүү нэр хүндтэй тэмцээнд Монгол Улсаа төлөөлж зургаан модель оролцсоноос “Монгол модель” агентлагийн загвар өмсөгч П.Жадамба эрэгтэй моделийн төрөлд хоёрдугаар байр, мөн нийт оролцогчдоос шилдэг аравт шалгарсан. Пүрэвдоржийн Жадамба аав, ээж, эгчийн хамт амьдардаг. Тэрбээр 21 настай, 187 см өндөртэй. Мандах бүртгэл дээд сургуулийн гуравдугаар курсын оюутан юм. Анх танил нь модель болохыг зөвлөж, өөрөө ч сонирхолтой байсан учраас “Монгол модель” агентлагт бүртгүүлснээр амжилтын гараагаа эхлүүлжээ. “Asian New Star Model Contest”-д манай улсын моделиуд долоо дахь жилдээ оролцож байгаа бөгөөд загвар өмсөгч н.Баяраа 2012 онд түрүүлж байсан юм.
О.АРИУНЦЭЦЭГ