Ерөнхий сайд Ж.Эрдэнэбатыг хууль зөрчсөн гэж үзэн Үндсэн хуулийн цэцэд шалгуулахаар хандсан талаараа өнөөдөр 11 цагт “Монгол ньюс” мэдээллийн төвд эрхзүйч А.Гантамир мэдээлэл хийлээ.
Тэрээ “Аймгуудын засаг нарыг сонгох үйл ажиллагаа хууль зөрчиж байна. Тухайлбал, Сүхбаатар аймаг 33 төлөөлөгчийн суудалтай. Үүний 16-г нь МАН, 16-г АН авсан. Үлдсэн нэг суудал нь дахин сонгууль явагдахаар болсон байгаа. Аль нэг нам нь олонх болж чадаагүй. Гэтэл хууль зөрчиж МАН-ын 16 төлөөлөгч маргаантай байгаа төлөөлөгчөө хуралдаанд оруулж ирэн, засаг даргаа томилсон. Хоёр шатны шүүхээс хууль зөрчсөн нь тогтоогдож, нэрсийн жагсаалтаас хасагдсан, санал өгөх эрхгүй Д.Болдбаатар төлөөлөгч энэ хуралд санал өгч хууль зөрчсөн. Мөн тухайн өдрийн хурлын шийдвэр ямар нэгэн тамга тэмдэг дарагдаагүй байтал ерөнхий сайд руу илгээсэн. Ингэснээр З.Энхтөр гэдэг хүн Сүхбаатар аймгийн засаг даргаар томилогдлоо. Ерөнхий сайд энэ асуудалд маш хариуцлагагүй хандаж, тамга тэмдэггүй хурлын шийдвэрийг хүлээн авлаа. Энэ сарын 21-ний өдөр М.Батсуурийг албан тушаалаас нь чөлөөлж, З.Энхтөрийг томилсон захирамж гаргасан. Засаг дарга төрийн албанд гурван жил ажилласан, мэргэшлийн хүн байх ёстой. Гэтэл З.Энхтөр төрийн албанд нэг ч жил ажиллаагүй. Энэ бүхнийг ерөнхий сайд үл харгалзан шийдвэрээ гаргасан. Үүгээр ерөнхий сайд Үндсэн хуулийн 1.2 дахь заалтыг зөрчсөн байна. Сүхбаатар аймгийн ИТХ-ын хуралдаанд зөвхөн МАН-ын саналын эрхтэй 16 хүн нь оролцсон, ирцийн бүрдүүлэлт хуулиндаа хүрээгүй. МАН-ынхан тамга нь байсаар байтал “Тамга тэмдэг алга болсон тул хийлгэнэ” гэж Ч.Улаан гишүүнээр дамжуулан хүсэлт гаргаж, тамгаа хийлгэсэн. Гэтэл хуучин тамга нь хэвээрээ байж байгаа. Энэ мэтээр хууль зөрчиж байгаа нь буруу. Өчигдөр З.Энхтөр ажлаа хүлээн авсан. Үүнээс хойших шийдвэрүүд бүгд хууль зөрчсөн болж таарна. Тиймээс бид ерөнхий сайдыг бид хууль бус захирамжаа буцааж, хуулийн дагуу явагдсан хурлын шийдвэрийг хүлээн авахыг шаардаж байна” гэлээ.