Чингисийн талбайд байт харвааны Дэлхийн аваргын шийдвэрлэх харваа болно

Байт харвааны оюутны Дэлхийн аварга шалгаруулах тэмцээн Монгол Улсад анх удаа болж байна. Тэмцээнд дэлхийн 24 орны 250 орчим тамирчин Компаунд болон Рекурв гэсэн хоёр төрөлд ганцаарчилсан, холимог хос, багийн төрлөөр өрсөлдөж байгаа юм. Тус тэмцээнийг Монгол Улсын Засгийн газрын тогтоолоор ЭМСЯам, БСШУЯ, БТСХТөв, НЗДТГазар, МОСХолбоо, Байт харвааны холбоод хамтран явуулж буй.

Тэмцээний эхний өдрүүдэд урьдчилсан харваа болж, шигшээд өрсөлдөх болон хүрэл медалийн эзэд тодорлоо. Өнөөдөр буюу ням гаригт алт болон ганцаарчилсан төрлийн хүрлийн төлөөх шийдвэрлэх харваа Чингисийн талбайд болно.

Одоогоор АНУ хоёр хүрэл медаль хүртээд байгаа бол Франц, ОХУ, Япон, Малайзын багууд нэг хүрэл медаль хүртжээ.