“Улаанбурханы эсрэг хамтдаа” уриатай дархлаажуулалтын аян орон даяар явагдаж байна. Дархлаажуулалтад 18-30 насныхан заавал хамрагдах заалттай бөгөөд өнөөдрийн байдлаар нийслэлд вакцинд хамрагдах ёстой иргэдийн 52 хувь нь хамрагдаад байгаа бол хөдөө орон нутагт харьцангуй идэвхи муутай байна.
Энэ талаар ХӨСҮТ-ын хэвлэл мэдээллийн ажилтан Ч.Уртнасан “Вакциныг харьяалал хамаарахгүй хийнэ. Тиймээс ажил, гэртээ хамгийн ойр аль нэг эмнэлэгт очоод вакцин хийлгэж болно. Ажлын байраа орхих боломжгүй бол албан байгууллагаас өгсөн захиалгын дагуу явуулын цэг очиж ажил дээр нь вакцин хийж байгаа. Дархлаажуулалтын тухйа хуулинд, хэрвээ халдварт өвчний дэгдэлтийн үед нийтийг хамарсан дархлаажуулалтад оролцохоос татгалзсан болон эсэргүүцсэн бол 20-30 мянган төгрөгөөр торгоно гэсэн заалт байдаг. Гэвч бид торгох, шийтгэхийг урьтал болгоогүй.
Гагцхүү тавдугаар сарын 25-наас өмнө амжаад вакцинаа хийлгээч ээ гэж уриалж байгаа. Энэ нь эргээд өөрсдийгөө болоод үр хүүхэд, ах дүүс, найз нөхдөө улаанбурханаар өвдөхөөс сэргийлж байгаа хэрэг юм” гэлээ. Улаанбурханы дархлаажуулалтын аян энэ сарын 25 буюу ирэх долоо хоногийн лхагва гаригт дуусах тул амжиж вакцинаа хийлгэхийг мэргэжилтнүүд уриалж байна.